Nagkatigum na ang Provincial Mining and Regulatory Board (PMRB) nga mahimong responsable sa pag-monitor ug pag-review sa permits ug uban pang-mining activity applications.
Kini maoy gipahibawo ni Aldwin Empaces, Assistant Administrator sa Kapitolyo.
Subay sa mandato sa Philippine Mining Act, langkuban kini sa lima ka miyembro nga mao ang Mines and Geosciences Bureau isip chair, ang gobernador isip vice chair, duha ka representatives gikan sa mining sector, ug usa ka miyembro gikan sa civil society organization.
Kabahin sa mando ni Cebu Governor Pamela Baricuatro nga kinahanglan nga transparent ang special review committee nga maoy morekomendar sa mga palisiya nga ipatuman aron malikayan ang iregularidad sa pagkuha og quarry permits ug ubang related mining activities.
Gipasalig usab niini ang patas nga transaction sa tanan nga mga stakeholder.
Kahinumduman nga sa Hulyo 28, gimando ni Baricuatro ang pagsuspenso sa tanang mining operations sulod sa 30 ka adlaw batok sa 10 ka mga kompaniya ug siyam ka mga special disposal permit holders subay sa kalapasan sa regulatory standards.
Samtang si Empaces, nga nangulo sa special review committee, nagkanayon nga andam na kining mosumiter sa mga recommendations ngadto kang Baricuatro alang sa approval niini.
Lakip sa reporma nga giduso niini ang pagpahapsay sa proseso sa pagkuha og permits, pagsiguro ng nisubay ang mga operator sa environmental laws ug regulatory standards ug sigurohon nga walay ni bisan kinsang paburan. / ANV