NASIKOP sa Argao Municipal Police Station (AMPS) ang high value individual ug iyang mga kauban atol sa pagpatuman sa search warrant sa balay niini alas 4:50 sa hapon, Huwebes, Agusto 14, 2025, sa Barangay Apo, Lungsod sa Argao, Cebu.
Ang suspek giingong sakop sa gun-for-hire ug robbery group nga naglihok sa tibuok Probinsiya sa Sugbo.
Ang napusasan ug nabalhog sa AMPS custodial facility mao sila si Eduardo Lazaga Carreon, alyas Eddie, 38, taga Barangay Apo Argao, ug Jade Michael Montalla, 19, taga Barangay Bae, Lungsod sa Sibonga.
Nakuha sa mga operatiba sa AMPS sa pagpangulo sa hepe niini nga si Police Major Janus Giangan ang duha ka mga kalibre .45 nga pistola, duha ka magazines, ug 11 ka bala niini.
Lakip sa nakuha sa sulod sa panimalay ni Carreon ang lima ka bulto sa gituohang shabu nga motimbang og 25 gramos nga adunay standard drug price nga P170,000.
Ang AMPS nipatuman sa warrant of arrest nga giluwatan ni Judge Francis Rainier Navarrete ang Presiding Judge sa RTC 7th Judicial Region Branch 93 sa Argao batok kang Carreon sa kasong kapalapasan sa
Republic Act 10591 o illegal possession nga adunay gitugot nga piyansa nga balor P120,000.
Matod ni Giangan nga si Carreon giila nga sakop sa Roel Gomez gun-for-hire group ug robbery group.
Matod pa nga taudtaod na siya nga gipangita human nadakpan ang mga kaubanan niini atol sa ilang pagukod sa armadong mga tawo sa bukid.
Human na-monitor nga nibalik siya sa Barangay Apo uban sa iyang bag-ong na-recruit nga si Montalla, ila dayon gikuhaan og search warrant sa korte.
Nalambigit ang maong grupo sa mga kasong pagpatay ug pagpanulis lukop Probinsiya sa Sugbo.
Base sa ilang nakuha nga kasayuran gikan sa intelligence community, ang grupo ni Roel Gomez nakigkunsabo na sab sa Ozamis Robbery Group. / AYB