Mokampanya og balik sa Olympics ang Cebuana weighlifter nga si Elreen Ando.
Si Ando, kinsa lumad nga taga Carreta, Cebu City, naka-qualify sa 2024 Paris Olympics human sa maayo niyang performance sa women’s 59kg event sa 2024 IWF World Cup.
Gianunsyo kining maong kalambuan sa Philippine Olympic Committee sa ilang social media.
Sa samang kategoriya, mikampanya sab ang laing Pinay nga si Tokyo Olympics gold medalist Hidilyn Diaz apan napakyas kini pag-qualify.
Si Ando nakarehistro og total lift nga 228kg nga gikan sa 100kg sa snatch ug 128kg sa clean and jerk samtang si Diaz igo lang nakatali og total lift nga 222kg.
Ang produkto sa University of Cebu (UC) maoy ikasiyam ug labing ulahing atleta sa Pilipinas nga naka-qualify sa Paris Games sunod nila ni EJ Obiena, Carlos Yulo, Aleah Finnegan, Eumir Marcial, Nesthy Petecio, Aira Villegas, John Ceniza ug Rosegie Ramos. / ESL