Dako og pagsalig ang kampo ni Reymart “Cebuano Assassin” Tagacanao nga molampos ang lumad nga taga Napo, Carcar, Cebu sa dakong tahas niini sa “Kumong Bol-Anon XIV” nga gikatakda karong Marso 8, 2024 sa Saulog gymnasium sa Tagbilaran City, Bohol.
Si Tagacanao, 24, kinsa sakop sa Villamor Boxing Gym sa Mandaue City, makigbatok kang Indonesian Hamson Lamandau alang sa inilugay sa bakanteng World Boxing Association (WBA) Asia super flyweight title sa co-main event sa promosyon nga gipasiugdahan sa PMI Bohol Boxing.
Mao kini ang labing unang title fight nga sagubangon ni Tagacanao apan matod sa iyang trainer nga si Edito Villamor, wala kini nibati bisan gamay nga pressure.
“Wala siya’y pressure. Salig kaayo ko nga modaog si Tagacanao tungod sa iyang kinaiya sa training. Grabe kaayo ang iyang paningkamot alang sa iyang pamilya,” matod ni Villamor.
Asoy ni Villamor nga usa sa sparring partners ni Tagacanao mao si kanhi four-division world champion Japanese Kosei Tanaka.
“Nindot kaayo ang iyang (Tagacanao) sparring. Maayo ang iyang kondisyon. Ang pag-execute na lang sa among game plan, kinahanglan iyang ma-deliver,” dugang ni Villamor.
Gitataw ni Villamor nga dili basta-basta nga kontra si Lamandau hinungdan nga kinahanglang mapagawas ni Tagacanao ang tanan niining ikabuga ning awaya.
Si Tagacanao, kinsa usa sa sumosulbong nga mga boksidor sa Sugbo, naggunit og 7-0, 6KOs nga rekord samtang si Lamandau, 29, adunay 12-5-1, 9KOs nga baraha.
Sa main event sa promosyon, makigsangka si PMI boxer Virgel Vitor batok ni Korean Tae Sun Kim alang sa inilugay sa bakanteng World Boxing Organization (WBO) Oriental super featherweight title. / ESL