Cebuano rapper gibalhin na sa city jail; uyab, pamilya miduaw

KISS: Atubangan sa mga sakop sa media, way panagana nga nag-kiss sila si Jed Andrew Salera, mas naila nga Range 999 sa iyang pagka rapper, ug ang iyang uyab sa wa pa siya gibalhin sa Cebu City Jail. /
KISS: Atubangan sa mga sakop sa media, way panagana nga nag-kiss sila si Jed Andrew Salera, mas naila nga Range 999 sa iyang pagka rapper, ug ang iyang uyab sa wa pa siya gibalhin sa Cebu City Jail. / ARNOLD Y. BUSTAMANTE

Nibisita sa temporary custodial facility ang hinigugma ni Jed Andrew Salera nga naila sa iyang angga pagka rapper nga si Range 999 sa wa pa siya gidala sa Cebu City Jail sa Lunes sa buntag, Abril 8, 2024 subay sa commitment order nga giluwatan sa korte.

Nabalhog sa Mabolo police station si Range 999 sulod sa 21 ka adlaw human niya mapusili ug namatay ang American national nga si Michael George Richey sa gawas sa usa ka bar niadtong Marso 17, 2024 sa buntag.

Namatay si Richey sulod sa Cebu City Medical Center (CCMC) sa Marso 19.

KANTA

Sa wala pa dalha ang Cebu­ano rapper, gihalaran una niyag kanta ang iyang hinigugma nga iyang gi-compose samtang naa sa siya sa sulod sa selda nga nag-ulohan og “Lodi.”

Nagsentro kini sa ilang relasyon nga bisan naa siya sa sulod sa koral nga puthaw, magpabilin ang iyang gugma dungan sa panghinaot nga dili siya mahulipan sa laing lalaki.

Nahimo’ng emotional ang mga kaubang Person Under Police Custody sa Mabolo Police Station nga nakauban ni Salera sulod sa 21 ka adlaw kay alang niya patas ang ilang relasyon sa sulod.

Kon unsay iyang makaon, mao usab ang kan-on sa tanang nangadakpan sa mga operation sa Mabolo Police Station.

“Kami man gud diri sa sulod patas ra mi tanan. Kon unsay makaon nako, makaon sad nila tanan,” matod ni Salera.

Kompleto usab ang mga kabanay niini diin dala nila ang senina niya nga maoy dalhon sa Cebu City Jail.

Si Police Lieutenant Colonel Janette Rafter, deputy city director for operations sa Cebu City Police Office, nagkanayon nga human na-commit sa Cebu City Jail si Salera, ang ilang paabuton na lang mao ang pagsugod sa pagdungog sa kaso niini.

“Ang amoa n alang ani puhon mao ang proceeding sa kaso, kon ipatawag man ang mga arresting personnel,” matod ni Rafter.

Samtang gi commit na usab sa City Jail ang laing kontrobersyal nga si Harbie Cuervo, kadtong lalaki nga mosakay og mga public utility jeepney ug mokanta apan manapat kon walay mohatag kaniya og sensilyo.

Nidalit usab siya og kanta sa wala pa siya dalha sa city jail.

Siya nibutyag nga andam siya nga makig-collab kang Range 999 kon magkita sila sa sulod sa bilanggoan.

“Mag collab mi ni Range didto. Mag sorry lang ko sa akong nasad-an. Dili na ko mousab, Mam, Sir. Mangayo lang kog dispensa nila tanan katong ako napasakitan,” matod ni Cuervo.

Nipasalig si Cuervo nga inig gawas niya sa bilanggoan, di na siya mobalik sa iyang naandan nga buhat. /

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph