Agi’g pasiuna nga pagsaulog sa Valentine’s Day, usa ka dalaw nga babaye nagdala og gift alang sa iyang kapuyo nga nabilanggo sa Mandaue City Jail sa Martes, Pebrero 13.
Gibutyag ni Jail Supt. Jonathan Bartal, warden sa city jail sa dihang nahinabi sa Superbalita Cebu sa Martes, Pebrero 13, nga ang maong dalaw suway nga nipalusot og cellular phone ug shabu pinaagi sa pagpasok niini diha sa iyang kinatawo.
Ang dalaw gitago sa pangalang Jenny, 27, taga Barangay Canduman, dakbayan sa Mandaue.
Iyang giduaw ang iyang kapuyo sa male dormitory sa facility nga nahimutang sa Barangay Basak, Mandaue City alas 2:30 sa hapon sa Martes, Pebrero 13, 2024.
Apan wa nisalir ang paagi ni Jenny sa dihang gipaubos siya sa makuting inspection sa jail guards, ug nahikapan ang nagbagal nga butang sa iyang bilahan.
NASULOD TANAN
Sa dihang gibira ang nisiwil nga condom sa iyang kinatawo, didto gisuksok ang cellular phone nga keypad ug pito ka tin foil strips ug usa ka putos nga shabu.
Ang drugas gibana-bana nga motimbang og dos gramos.
Nasayran nga nidalaw si Jenny sa iyang live-in partner, kinsa napriso gumikan sa kasong pagpanglugos.
“Malagmit ilang gamiton ni sa Valentine’s Day, kunsumo nila o kaha testing nila makalusot,” sigun pa ni Bartal sa Superbalita Cebu.
Hayan gisugo si Jenny sa iyang kapuyo sa pagdala sa maong butang
Gituohan nga ibaligya ang maong shabu nga magsilbing kunsomo sa Valentine’s Day.
Ang dinakpan wala nitug-an kon diin gikan ang shabu.
PASIDAAN
Gipasidan-an ang mga dalaw nga dili mosuway sa pagpalusot og kontrabando aron dili masugamak og kaso ingon man pagkabilanggo.