Sa ilang unang panag-abot human ang National Basketball Association (NBA) Finals sa miaging season, ang Boston Celtics napatigbabaw gihapon batok Dallas Mavericks, 122-107, kagahapon didto sa Dallas.
Nangulo sa defending champion Celtics si Jayson Tatum nga dunay 24 puntos ug si Derrick White nga mitunol og 23 puntos, lakip na ang unang 11 puntos sa Boston sa third quarter.
Midugang si Jaylen Brown og 22 puntos para sa Celtics.
Samtang ang Mavericks misandig kang Kyrie Irving nga nakahimo og 22 puntos, si Quentin Grimes miamot og 20 puntos gikan sa bench ug si Daniel Gafford nihatag og 19 puntos ug nakatabla sa iyang season high nga 15 rebounds.
Ang Celtics ug Mavs maoy gaabot sa NBA Finals sa miaging season, diin midaog ang Celtics, 4-1. / RSC