Celtics kampyon!

Celtics kampyon!
KAMPYON: Malipa­yong nagpahulagway ang tanang mga sakop sa Boston Celtics kauban ang ilang kahigalaan human nila naangkon ang kampyunato sa 2023-24 National Basketball Association (NBA). Sa laing hulagway, nagsaulog si Celtics superstar Jayson Tatum human siya nakapuntos sa 1st half batok sa Dallas Mavericks sa Game 5 sa finals series ning Martes, Hunyo 18, 2024 (PH time). / AP

Human sa 16 ka tuig, ni­kampyon pagbalik ang Boston Celtics ug ilaha kining na­himo sulod mismo sa ilang balwarte – ang TD Garden.

Atubangan sa ilang mga sumosunod, gipanglampurnas sa Celtics ang Dallas Mavericks, 106-88, sa Game 5 nga maoy nagtiklop sa 2023-24 National Basketball Association (NBA) Finals series, 4-1, ning Martes, Hunyo 18, 2024 (PH time).

Tatum
TatumAP

Sa kinatibuk-an, kini maoy ika-18 nga kampyunato nga nahimo sa Celtics apan labing una kini sa kadaghan sa ilang kasamtangang puwersa nga naglakip sa ilang mga lider nga sila si Jayson Tatum ug Jaylen Brown.

“It means the world,” matod ni Tatum. “It’s been a long time. And damn I’m grateful.”

Gipangulohan ni Tatum ang kadaugan pinaagi sa iyang 31 puntos ug 11 ka assists samtang nidugang og 21 puntos ug walo ka rebounds si Brown, kinsa maoy napiling NBA Finals MVP.

“I share this with my brothers and my partner in crime Jayson Tatum,” asoy ni Brown.

Sulod sab sa 107 ka mga duwa sa playoffs nga nag-uban sila si Tatum ug Brown una sila nakabaton og kampyunato.

Si Jrue Holiday nidugang og 15 puntos ug 11 ka rebounds alang sa Celtics, nitampo og 14 puntos si Derrick White samtang nihatag og siyam ka puntos si Al Horford.

Ang coach sa Celtics nga si Joe Mazzulla, 35, nahimo’ng labing batan-ong coach nga nakadaog og kampyunato gikan ni Bill Russell niadtong 1969.

Nakuha kini ni Mazzulla sa iyang ikaduha pa lang nga season nga paggiya sa Celtics.

“You have very few chan­ces in life to be great,” matod ni Mazzulla.

Ang Mavericks gipangulohan ni Luka Doncic pinaagi sa iyang 28 puntos ug 12 ka rebounds, nidugang og 15 puntos si Kyrie Irving samtang niamot og 14 puntos si Josh Green.

Ang Mavericks maoy ika-157 nga team nga na­pakyas human nasuga­mak sa 0-3 nga biya sa best-of-seven series. Sa ka­say­sayan, wala pa’y team ang hingpit nga nakabangon gikan ning maong biya. / AP

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph