Bisan wala ang tulo sa ilang lig-ong mga haligi, ang overall leader Boston Celtics nakamaneho gihapon paglampornas sa host Utah Jazz, 123-107, ning Miyerkules, Marso 13, 2024 (PH time) sa National Basketball Association (NBA).
Unom ka mga magduduwa sa Celtics ang ningmugna og dobleng numero nga mga puntos – pinangulohan sa 38 ni Jayson Tatum – aron tapakan ang haw-ang nga nabiyaan sa nangaangol nga sila si Jaylen Brown (back), Kristaps Porzingis (hamstring) ug Al Horford (toe).
Niabot sa 20 ka three-point shots ang napasulod sa Celtics nga maoy dakong hinungdan nga nakontrolar nila ang kombati.
“The law of averages, you play so many games you won’t be perfect every night. You have to stick with it and trust that you’re going to have more good days than bad,” matod ni Tatum kabahin sa ilang natali nga 40.8% sa 3-point range.
Si Derrick White nidugang og 24 puntos alang sa Celtics, niamot og 16 si Jrue Holiday, nihatag og 14 puntos si Sam Hauser, nitunol og 12 puntos si Luke Komet samtang nitampo og 10 puntos si Payton Pritchard.
Ang Jazz gipangulohan ni Keyonte George pinaagi sa iyang 26 puntos, nihatag og 21 puntos si Fil-Am Jordan Clarkson samtang niamot og 20 puntos si Collin Sexton.
Ang Jazz, nga ningkombati nga wala ang ilang leading scorer nga si Lauri Markkanen (thigh) ug Taylor Hendricks (toe), nakamugna og 11-3 run aron pahakan ang labaw sa Celtics ngadto sa duha na lang ka mga puntos sa 3rd quarter.
Apan human niini, makabungog nga 20-0 run ang gihimo sa Celtics nga maoy nakainat sa ilang labaw ngadto sa 113-91 sa nahabiling 6:28 minutos. Ningkuyaig na ang Jazz gikan niini hangtod na sa katapusang gutlo. / AP