Giaprubahan sa National Basketball Association (NBA) ning Huwebes, Agusto 14, 2025 (PH time), ang pagbaligya sa prangkisa sa Boston Celtics ngadto sa investment group nga gipangulohan ni Bill Chisholm, lima ka mga buwan human nauyonan ang $6.1 billion nga presyo niini.
“The NBA Board of Governors has unanimously approved the sale of the controlling interests in the Boston Celtics to an investor group led by Bill Chisholm,” opisyal nga pamahayag sa NBA.
Si Chisholm maoy managing director ug co-founder sa Symphony Technology Group.
Ang kanhi tag-iya sa Celtics nga si Wyc Grousbeck ug Steve Pagliuca ningpalit sa prangkisa sa Celtics niadtong 2002 sa kantidad lang nga $360 million.
Giingon nga magpabilin si Grousbeck sa iyang obligasyon sa team isip chief executive officer ug governor hangtod sa 2027-28 season.
Apan gikataho sa US media ning semanaha nga si Chisholm, kinsa nitawag sa iyang kaugalingon nga die-hard Celtics fan, mao na ang mopuli isip team governor.
Sa kinatibuk-an, ang Celtics nakalabni og 18 ka mga kampiyunato, labing daghan sa kasaysayan sa NBA. / Gikan sa wires