Sulod mismo sa ilang mga balwarte, parehong nangatiklo ang mga inilog nga mao ang defending champions Boston Celtics ug No. 1 overall Oklahoma City Thunder batok sa ilang tagsatagsa sa kontra ning Martes, Mayo 6, 2025 (PH time), sa duha ka mga Game 1 sa 2nd round playoffs series sa National Basketball Association (NBA).
Nausik sa Celtics ang ilang 20 puntos nga labaw ug nasugamak sila sa overtime nga pagkapilde batok sa New York Knicks, 105-108, sa Eastern Conference samtang kulbahinam sab nga pilde ang nasinati sa Thunder batok sa Denver Nuggets, 119-121, sa Western Conference.
Ang Knicks gipangulohan nila ni Jalen Brunson ug OG Anunoby pinaagi sa ilang 29 puntos matag usa.
“It was a great team win,” matod ni Knicks coach Tom Thibodeau. “We started well, then we fell into a hole and then we fought our way out and then we made tough plays down the stretch.”
Ang Knicks nabiyaan og dako, 52-72, sa sayong bahin sa 3rd quarter apan human niini, hinayhinay nga nanginit ang ilang opensa hangtod nga nakapugos sila og overtime, 100-100.
Sa nahabiling 1:47 minutos sa overtime, nakaposte og unom ka mga puntos nga labaw ang Knicks, 108-102.
Human niini, kombati sa depensa ang nasaksihan diin wala na nakadugang og puntos ang Knicks ug tulo ra sab ka mga puntos ang nadugang sa Celtics.
Sa laing sangka, ang three-pointer ni Aaron Gordon sa nahabiling tulo ka mga segundos mao ang nag-agak sa makapakaging nga daog sa Nuggets batok sa Thunder.
Puntos matag usa:
Eastern Conference
New York (108)- Brunson 29, Anunoby 29, Towns 14, Hart 14, McBride 11, Bridges 8, Robinson 3.
Boston (105)- Brown 23, Tatum 23, White 19, Holiday 16, Pritchard 13, Horford 7, Comet 4.
Western Conference
Denver (121)- Jokic 42, Gordon 22, Murray 21, Westbrook 18, Braun 11, Watson 3, Strawther 2, Porter Jr. 2.
Oklahoma (119)- Gilgeous- Alexander 33, Caruso 20, Williams 16, Dort 14, Holmgren 12, Hartenstein 12, Wiggins 5, Williams 4, Wallace 3. / Gikan sa wires