Ceniza: Damgo gipadaplin aron moserbisyo

Kap. Carlitos E. Ceniza
Kap. Carlitos E. Ceniza

Pagpanguma unta ang nakita ni Carlitos E. Ceniza sa iyang kaugalingon sa Bohol apan lahi nga dalan ang iyang gisubay human sa i­­yang pagpapili sa Barangay and Sangguniang Kabataan e­­lections 2023 (BSKE) hu­man siya nakadawat og 1,500 ka mayoriya nga botos.

“I really have the love for the people, but wa nako damha nga they really love me more,” matod niya atol sa interbyo sa SuperBalita Cebu.

Karon, ang probinsyano nga gipangandoy nga kinabuhi ni Ceniza sa Bohol wa niya gidayon kay iyang giuna ang pagka barangay kapitan sa Kalunasan.

“Mag-farming man gud unta ko pero pukawon gyud akong konsensya pirmi. Mao ni akong pag-ampo ug inspirasyon sa katawhan, ang pagserbisyo,” pamahayag ni Ceniza atol sa iyang pakigpulong sa Barangay Assembly niadtong Abril 2, 2024.

100 KA ADLAW

Ang Brgy. Kalunasan adu­nay lain-laing LGBTQ nga mga kawani ug mga batan-on nga maabi-abihon atol sa Barangay Assembly ni Ceniza.

Iyang gipresentar ang mga buhatan ug departamento ubos sa iyang pagpangulo nga mao ang: OPPRA Health Center, Kalunasan Health Center, Kalunasan Emergency Response Team (KERT), GAD, Lupon, Fire/Disaster, Barangay Kalunasan Water services, Barangay Public Safety Officer, Kalunasan Day Care Center, ug Barangay Admin.

Iyang gipahibawo nga si Kongresista Edu Rama motabang sa pagpundo sa wala pa mahuman nga gitukod nga lain nilang barangay hall.

Gipresentar usab niya ang bag-ong gihatag nga garbage truck ug bag-ong water pump ug mga ekipo. Sa iyang administrasyon nakatukod usab siya og Animal Bite Center.

GISAAD

Ang saad sa kampanya sa grupo ni Ceniza atol sa piniliay nasentro sa imprastraktura busa siya nanghinaot nga malugwayan ang ilang duha ka tuig nga termino sanglit iyang tinguha nga makabaton og infirmary hospital ang Kalunasan.

“Naa sa bukirang barangay, layo kaayo mi og siyudad,” matod ni Ceniza.

Ang infirmary magsilbi nga usa ka emerhensiyang ospital nga moatiman sa mga batakang panginahanglan sa pag-atiman sa panglawas, maghatag og limitado nga serbisyo medikal, nagpunting sa menor nga mga samad, mga sakit, ug naandan nga pag-atimang medikal ug isipon nga Level One nga ospital sumala sa programa sa Department of Health (DOH).

“Nagkastorya mi sa DOH ana, gi-encourage diay nila kada-LGU and run, so, timing kaayo ilang programa. Gitawag ni og Level 1,” pasabot niya.

Nakit-an ni Ceniza nga ang pagbaton og tambalanan makatabang sa pag-decongest sa tambalanan sa dakbayan.

Duna sab siyay mga application form gikan sa DOH nga i-fill-up samtang ang pundo giseguro nga suportahan ni Kong. Rama.

Uban niyang gipangandoy nga mga proyekto nga tukoron mao ang bag-ong barangay hall, mega dome gymnasium, ug boxing gym agi’g pasidungog sa buhi nga legend nga si Dodie Boy Peñalosa Jr.

Nagplano usab siya nga makaangkon og usa ka ektarya nga lote ang barangay aron ma-accommodate ang tanan nga mga imprastraktura tungod kay wala sila’y luna alang niini.

Si Ceniza gusto kaayo sa road rehabilitation, pag-abli sa access roads sa Brgy. Lahug ug Busay, saktong garbage collection ug water system reservoirs aron makaserbisyo ang ubang distributors sa iyang mga konstituwente.

PIYESTA

Sa labing unang higayon, ubos sa administrasyon ni Ce­niza, adunay kapistahan ang Ka­lunasan nga saulogon sa su­nodsunod nga mga kalihukan ug kalingawan karong Mayo.

Ang festival tawgon og Lunas Festival alang sa mga tanom nga kawayan nga abunda sa ilang barangay.

“Ang akong damgo, mao say inyong damgo, maningkamot ko kutob sa akong mahimo nga unta matuman nato. Pero dili ni nako mahimo og ako lang, nagkinahanglan ko sa inyung kooperasyon puhon,” matod ni Ceniza ngadto sa iyang mga konstituwente.

“Aron moasenso ta,” iyang pamahayag nga susama sa motto sa ilang barangay: ‘Asenso Kalunasan’.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph