Nasulod pagbalik sa top four ang Central Visayas sa 2026 Palarong Pambansa didto sa Agusan del Sur, nga natapos niadtong Dominggo, Mayo 31, 2026.
Ang Central Visayas Regional Athletic Association (CVIRAA) nakakuha og 32 ka bulawan, 30 ka silver, ug 44 ka bronse nga medalya aron masulod sa overall top four sa unang higayon sukad niadtong 2018.
Dako ang nahimong kalamboan sa CVIRAA gikan sa ilang ikapito nga dapit sa kinatibuk-an sa miaging tuig nga edisyon nga gipahigayon didto sa Ilocos Norte.
Sama sa naandan, gidominar sa National Capital Region (NCR) ang nasudnong torneyo sa paugnat sa kusog, diin sayon ra nilang nakuha ang ilang ika-19 nga overall championship pinaagi sa nahipos nga 91-71-71 gold-silver-bronze nga medalya.
Ang Region IV-A mitapos sa ikaduhang dapit nga adunay 55-50-60 nga medalya, samtang ang Region XI mipundo sa ikatolong dapit bitbit ang 34-32-34.
Mikompleto sa Top 5 ang Western Visayas nga adunay 31-36-45. / RSC
