Patay na nga naabtan sa mga personnel sa Inayawan Police Station, Cebu City Police Office ang usa ka lalaki human gipusil niadtong Biyernes sa alas 8 sa gabii, Agusto 23, 2024 sa All Season 3, Barangay Cogon Pardo, Dakbayan sa Sugbo.
Ang biktima giila sa iyang asawa nga si Nestor Abellanosa Tabacon Jr., 41, lumad nga taga Zamboanga Sibugay apan kasamtangan nga nagpuyo sa maong lugar ug driver sa Ceres Bus nga nagbiyahe sa Oslob-Cebu City vice versa.
Ang gitumbok nga responsable mao ra usab ang ilang silingan nga nailhan si alyas James, hingkod nga pangedaron.
Sigon sa mga saksi nga ilang nakita si alyas James nga nagpabuto sa makadaghang higayon sa maong dapit gamit ang wala matino nga kalibre sa armas.
Nasayran nalang nga nahagba na si Tabacon nga nag-angkas sa iyang giparada nga motorsiklo.
Human nalukapa ang biktima wa pa matagbaw ang suspek gibalikan pa niya dayon gitiwasan sa pagpusil nga daw gihurot ang bala.
Dali nga misibat si James nga misulod hilit nga lugar.
Nakahipos og tulo ka basiyo sa bala ang mga polis apan wa matino ang kalibre sa armas.
Atol niining pagsuwat padayon ang gilusad sa Inayawan police ang manhunt batok sa suspetsado ug gisubay sab ang motibo sa maong krimen. / AYB