Luwas ang 20 ka mga pasahero, drayber ug konduktor sa usa ka Ceres bus nga naugdaw sa sunog alas 11:47 sa buntag sa Lunes, Hunyo 10, 2024 sa nasudnong kalsada sa Canamucan II, Brgy. Canamucan, lungsod sa Compostela, amihanang Sugbo.
Ang drayber sa Ceres bus giila nga si Michael Gonzales Orque, 36, taga Brgy, Campusong, Borbon.
Ang Compostela Police Station nakadawat og tawag gikan sa usa ka concerned citizen nga may nasunog nga Ceres passenger bus (CEH 814).
Ang kapulisan sa Compostela daling niresponde uban sa kabumberohan sa lungsod.
Pasiunang imbistigasyon nasuta nga ang bus padulong sa Kawit, Medellin gikan sa North Bus Terminal sa Siyudad sa Sugbo.
Ang drayber nakapanimaho og aso su’d sa bus hinungdan nga siya ni-park daplin sa highway ug nasuta nga ang aso gikan sa dashboard panel.
Dali niyang gipakanaug ang 20 ka mga pasahero samtang si Orque nikuha og fire extinguisher ug iyang gipasiritan ang kayo, apan nidako kini hangtod nga nikaon sa tibuok bus. / DVG