Daghang maayong kalambuan ang naghuwat sa Cebu Schools Athletic Foundation Inc. (CESAFI) sa ugma damlag sa pagdumala sa bag-ong mga opisyal niini nga gipangulohan ni Atty. Augusto W. Go, tag-iya ug presidente sa University of Cebu.
Mao kini ang gipadayag ni Cesafi outgoing president Atty. Paulino A. Yabao sa University of Southern Philippines Foundation (USPF) sa iyang mensahe atol sa induction ug oath taking sa bag-ong mga lider sa Cesafi niadtong Huwebes sa gabii, Mayo 29, 2025, sa Citadines Hotel, Baseline Center sa dalan Juana Osmeña, Dakbayan sa Sugbo.
“Cebu is not just in good hands but in the best hands,” tipik sa pamahayag ni Yabao.
Sa iyang bahin, si Go nidayeg ni Yabao sa pagdumala niini sa Cesafi ug nisaad nga ipadayon niya ang mga nahimo ni Yabao sa labing dakong school-based competition sa Visayas ug Mindanao.
“You did a good job, I will just follow your footsteps,” matod ni Go ngadto kang Yabao.
Ang liderato ni Go magsugod karong tuig 2025 atol sa ika-25 ka mga tuig nga kasumaran sa Cesafi, nga adunay tema nga 25 Years of Excellence: Honoring the Past, Embracing the Future.
Gilaumang mokawat og dakong atensyon sa liderato ni Go mao ang dakong kausaban sa Cebu Coliseum, nga maoy venue sa gikahinamang basketball event sa Cesafi.
Padayon pa ang renovation sa Cebu Coliseum apan gipahibalo ni Go nga mahuman na kini sa dili pa ang opening ceremony sa 2025-26 season sa Cesafi karong Septiyembre 13.
Gipasabot ni Go nga nibubo siya og dakong kantidad alang sa renovation sa Cebu Coliseum diin lakip sa mga gilaumang mokuha’g dakong atensyon mao ang pagtaod og air conditioning system ug ang sawog sa basketball court nga aprubado sa Fiba.
“We’re expecting a cooler Cesafi 2025-26 season. Let the games begin,” batbat ni Go.
Gawas ni Go, ang ubang bag-ong mga opisyal sa Cesafi mao sila si Fr. Francisco Antonio Estepha, SVD sa University of San Carlos (vice president), Dr. Dino Diez sa Velez College (treasurer), ug Fr. Randy Figaracion, SBD sa Don Bosco Technical College (secretary).
Ang bag-ong mga opisyal sa Cesafi nag-oath taking atubangan ni Judge Vincent Deo Albeos. / ESL