Isip pagpangandam sa 2024 Cebu Schoosl Athletic Foundation Inc. (CESAFI) basketball tournament, ang kadagkuan sa liga nagpahigayon og duha ka mga adlaw nga refresher course alang sa mga referee nga gamiton sa bag-ong season.
Gihimo kini niadtong Septiyembre 1 ug 2, 2024 sa Cebu Sports Hub sa Casuntingan, Dakbayan sa Mandaue.
Gikuha sa CESAFI ang beteranong mga referee sa University Athletic Association of the Philippines (UAAP) nga sila si Ian Borbe ug Mollie De Luna aron modumala sa kalihukan.
Kapin sa 100 ka mga referee ang nangapil sa kalihukan, nga gitambungan nila ni Commissioner Felix Tiukinhoy Jr. ug deputy commissioners nga sila si Danny Duran ug Danny Villadolid.
Ningtunga sab ang mga sakop sa technical committee nga sila si Ed Aguilo, Edwin Dejacto ug Titing Berido.
Sa mga nangapil, 80 lang ka mga referee ang kuhaon sa Cesafi aron maka-officiate sa 12-Under, 15-Under, juniors ug college divisions.
Ang kompetisyon sugdan karong Septiyembre 21, 2024 sa Cebu Coliseum. / ESL