Gihangyo sa Cebu Cultural and Historical Affairs Commission (CHAC) ang Cebu City Government nga kasamtangang undangon ang pagbutang sa mga underground cable tungod kay nahimutang sa heritage district sa siyudad ug adunay posibilidad nga may mga artifacts nga makawtan.
Niadtong Marso 3, gipasugdan sa kagamhanan ang pilot installation sa mga kable sa ilalom sa yuta sa palibot sa Plaza Sugbo, sa atubangan sa Cebu City Hall ug Basilica Minore del Santo Niño de Cebu.
Ang unang hugna magsugod sa Marso nga maglakip sa Basilica Minore del Sto. Niño de Cebu, City Hall, sa downtown area, samtang apil sab ang ubang mga lugar nga gipili lakip ang P. Burgos St., M.C. Briones St., Osmeña Blvd., ug D. Jakosalem St., ug ang South Road Properties.
Sumala sa suwat ni Dr. Jose Eleazar Bersales, Consultant for Museums and Heritage of the Province of Cebu, gikan sa usa ka resolusyon sa CHAC nga gipadala sa City Council, ug kang Cebu City Mayor Raymond Alvin Garcia nga nag-awhag nga dili una ipadayon ang pagbutang sa mga kable sa ilalom sa yuta tungod kay posibleng madaot ang mga archaeological sites.
Gipadayag ni Bersales nga nakadawat siya og impormasyon nga ang Fibernet Konstrukt Corp., ang contractor sa pilot underground cabling project, nakigsulti na sa usa ka archaeologist aron motabang sa proyekto. / EHP