Nanalipod si Lapu-Lapu City Mayor Ma. Cynthia “Cindi” King-Chan sa gihimong pagpanghipos sa mga laag nga mga iro sa palibot.
Ang mayor nipasabot nga usa kini ka regular nga lakang alang sa seguridad sa publiko ug dili lang tungod sa mga internasyonal nga duwa sama sa Ironman competition.
Subay sa maong isyu, gipahayag ni Chan sa mga tigbalita niadtong Biyernes, Agusto 7, 2026, nga regular nga gipang-impound sa kagamhanan ang mga laag nga iro nga maglaruy-laroy sa pampublikong kadalanan aron makatabang sa pagpugong sa kaso sa rabies ug pagpanalipod sa mga residente.
Matod niya, ang mga nadakpan nga mga iro adto dad-on sa City Veterinary Office diin kini atimanon sa saktong paagi.
Gidugang sab niya nga ang mga residente mismo ang kanunay nga mohangyo nga kuhaon dili lang ang mga laag nga iro kundi lakip na ang mga mananap nga gipangbuhian sama sa baka ug kanding nga makahatag og peligro sa mga nag-drive sa dalan.
Sayo niini, nanawagan ang Mayari Animal Rescue Organization nga hunongon ang giingong pagpang-impound ug pagpahigayon og euthanasia o pagpatay sa mga laag nga iro sa dili pa ang umaabot nga Ironman 70.3.
Gipanghimakak sab ni Chan ang mga pasangil nga ang mga nadakpan nga mananap gipamatay pinaagi sa euthanasia.
Gipasabot niya nga ang euthanasia buhaton lamang sa mga iro nga dunay grabe na kaayo og sakit. / DPC