Chan mikuot una sa personal nga salapi alang sa cash incentives

Makabat sa P250,000 proposed budget ang giduso nga ihatag alang sa mga atleta nga taga Dakbayan sa Lapu-Lapu nga nakakuha og medalya sa Palarong Pambansa 2024.

Apan si Mayor Junard “Ahong” Chan mao una ang mikuot sa kaugalingong kwarta aron ihatag sa mga atleta ug ilisan ra siya human uyonan sa Konseho ang budget.

Si Chan nipahalipay sa mga atleta uban sa pagtunol sa cash incentives ug sertipiko.

Si John Vincent dela Cerna, chairman sa committee on sports sa Konseho, niendurso ngadto sa buhatan sa mayor sa maong budget nga ihatag sa student-athletes.

Matod ni Vince Dominic Carunggay, pangulo sa City Sports Commission Office, nga ang kantidad nga ihatag magdepende sa medalya nga nakuha.

Gitumbok niya si Asia Paraase nga makadawat og P30,000 alang sa iyang gold medal sa 3,000-meter ug 1,500-meter sa athletics events. Ang nakakuha og silver makadawat og P20,000 samtang ang bronze medalist hatagan og P10,000.

Gikataho nga dunay walo ka mga atleta nga taga Lapu-Lapu City nga nakakuha og medalya nga sakop sa delegasyon sa Central Visayas o Region 7.

Ang 64th Palarong Pambansa gi-host sa Dakbayan sa Sugbo ug nitapos niadtong Martes, Hulyo 16, 2024. / DPC