Mga duwa karon:
5:15 pm- CEC batok UV (High School)
6:45 pm- BC batok USC (College)
Angkunon og suway sa Benedicto College (BC) Cheetahs ang sayong liderato sa ilang pagpakigsangka sa University of San Carlos (USC) Warriors sa main game karong Martes sa gabii, Oktubre 1, 2024, sa Cebu Schools Athletic Foundation Inc. (CESAFI) basketball college division sa Cebu Coliseum.
Ang Cheetahs nagtinguha nga marehistro ang ikaduha nilang sunodsunod nga kadaugan human sila nasubhan og dakong daog batok sa Cebu Roosevelt Memorial Colleges (CRMC) Mustangs, 90-68, atol sa unang adlaw sa season niadtong Septiyembre 21.
Sa ilang bahin, ang Warriors nagtinguha nga makabangon human sila nasugamak sa kapildihan sa nag-una nilang duha ka mga tahas.
Sa premirong duwa, pahugtan og suway sa Cebu Eastern College (CEC) Dragons ang ilang paggunit sa solong liderato sa high school division sa ilang pagpakigsangka sa University of the Visayas (UV) Baby Green Lancers.
Ang Dragons adunay 3-0 nga rekord samtang ang Baby Green Lancers adunay 1-0 nga baraha.
Sa mga duwa niadtong Dominggo, Septiyembre 29, gipangbuntog sa University of Cebu (UC) Webmasters ang CRMC Mustangs, 79-65, sa college division.
Samtang sa high school division, ningdaog ang Don Bosco Greywolves batok sa BC Baby Cheetahs, 72-69, USPF Baby Panthers batok CRMC Baby Mustangs, 69-38, ug CEC Dragons batok UCLM, 66-50. / ESL