Moagas na ang singot sa mga utok ning Dominggo, Oktubre 22, 2023, sa pagpahigayon sa Cebu Executives and Professionals Chess Association (CEPCA) 33rd anniversary tournament nga giulohan og “7th Engr. Boy ‘Chessmoso’ Pestaño Memorial Chessfest” sa 4th level sa Robinsons Galleria.
Nag-una sa mga title contender mao sila si International Master Kim Steven Yap, FIDE Master Nelson Villanueva, National Masters Rommel Ganzon ug Rogelio Enriquez Jr, ug Arena Grandmaster Michael Joseph Pagaran.
Lakip pud sa lig-on nga challengers sila si Anthony Makinano, Diego Abraham Caparino ug Ronald Ganzon.
Matod ni national arbiter Kevin Yap nga modawat pa sila og on-site registration sa di pa magsugod ang duwa sa alas 10:30 sa buntag.
Kining maong torneyo gipahinungod sa bag-uhay lang nipanaw nga opisyal sa CEPCA nga si Apolonio “Jun” Olis.
Gawas sa P10,000 nga ganti’ng salapi, ang mogawas nga kampyon sa kompetisyon makadawat og tropeyo nga gipanganlan og Jun Olis Trophy.
Makakuha og P6,000 ang 2nd placer; P4,000 sa 3rd placer; P3,000 sa 3rd placer; P2,000 sa 5th placer; ug P1,500 sa 6th placer.
Ang masulod sa ikapito hangtod ika-10 makabulsa og P1,000 matag usa, P700 sa 11th-15th placers samtang P500 sa 16th-25th placers.
Ang top 2 Cepcans (A ug B) makasakmit og P1,000 ug P500 samtang ang top 2 sa seniors, ladies, ug U8, U12, U16, ug U20 players makadawat og P700 ug P500 nga ganti.
Nagbalor og P200 ang rehistrasyon sa seniors, ladies, Cepcans ug 14-under samtang P300 sa regular nga mga partisipante.
Ang torneyo gisuportahan sa Jemar Engineering Services, Celjem Construction and Development Corporation, ug ARQ Sports.
Para sa dugang nga impormasyon kabahin sa torneyo i-contact si Kevin Yap sa mobile number nga 0945-8559800.