Nagpagawas og pahimangno ang Ministry of Education sa China alang sa ilang mga estudyante nga nagplano nga motungha sa Pilipinas.
Sa ikaduha niini nga overseas study alert alang sa 2025, nagpasidaan ang ahensya nga huyang ang kahimtang sa seguridad sa Pilipinas sa kasamtangan ug gihimo niining basihan ang pagsaka sa krimen nga nag-target sa Chinese nationals.
Giawhag niini ang ilang mga estudyante nga adunay plano nga magtungha sa Pilipinas nga kinahanglang susihon una og maayo ang kabahin sa risgo, ug gikinahanglan ang pagkaalerto.
“Incidents involving local law enforcement harassing and inspecting Chinese nationals and enterprises have occurred frequently. Political gatherings, protests, and demonstrations have also become more common across the country, resulting in heightened security risks for Chinese nationals and institutions in the Philippines,” online post sa Chinese Embassy sa Manila.
Giawhag usab sa China ang ilang mga lumolupyo nga naa sa Pilipinas nga bantayan pag-ayo ang mga kalamboan sa lokal nga seguridad, palig-unon ang personal nga mga lakang sa kaluwasan ug pagpangandam alang sa emerhensya, limitahan ang dili kinahanglan nga paggawas, ug likayan ang mga tigom sa politika ug mga lugar nga daghang mga tawo.
Gipahinumduman sab sa Chinese Embassy ang ilang mga tawo nga mosunod sa lokal nga mga balaod ug regulasyon ug magpabilin nga mabinantayon batok sa posibleng mga hulga sa seguridad o mga scam. / TPM/SunStar Philippines