Usa ka Chinese national nga nagpakaaron-ingnon nga Pilipino ug upat niya ka kauban ang gidakop tungod sa paglapas sa mga balaod sa imigrasyon ug panarbaho.
Si Wang Chaoxin, 32, gidakop niadtong Miyerkules, Mayo 14, 2025, tungod sa paglimbong sa iyang pagkatawo ug pagdumala sa usa ka kompanya sa patigayon gamit ang peke nga pangalan sa Pilipino, sumala ni Bureau of Immigration (BI) Commissioner Joel Anthony Viado.
Matod ni Viado nga nadiskubrehan sa mga operatiba sa military intelligence nga si Wang nigamit og peke nga identity.
Giingong nakakuha siya og driver’s license sa Pilipinas, birth certificate, ug nagparehistro og kompanya ubos sa iyang gidala nga pangalan sa Pilipinas.
Atol sa mission order, si Wang gidakop uban sa upat ka kauban tungod sa paglapas sa mga kondisyon sa ilang pagpabilin sa nasod.
Gitaho nga tulo kanila naghupot og work visa apan nagtrabaho sa usa ka kompanya nga dili mao ang ilang gideklarar nga petitioner, samtang ang usa nakit-ang nagtrabaho nga walay permiso.
Ang mga operatiba sa BI wala maghisgot sa eksaktong dapit sa Sugbo diin gidakop ang mga indibiduwal.
Ang hiniusa nga operasyon uban sa Armed Forces of the Philippines ug sa National Bureau of Investigation nagsunod sa direktiba ni Presidente Ferdinand Marcos Jr., nga hugtan ang paggukod sa mga langyaw nga nalambigit sa mga ilegal nga kalihukan.
“Through close collaboration with the AFP and the NBI, we are able to act swiftly on intelligence reports and ensure that those abusing our immigration system are held accountable,” matod ni Viado. / PR, DPC