Gidawat ni Department of Social Welfare and Developmeny (DSWD) Undersecretary for Disaster Response Management Group (DRMG) Diane Rose S. Cajipe ang tulo ka vacuum machines gikan kang George Kenneth Lee, Country Manager, Humanitarian Services-Welfare ug Self-Reliance Department sa Church of the Latter-Day Saints (LDS), atol sa usa ka yano nga turnover ceremony niadtong Biyernes, Pebrero 2, 2024.
Ang LDS midonar sa vacuum machines ngadto sa Visayas Disaster Resource Center (VDRC), nga makapausbaw sa kapasidad sa VDRC sa pag-produce og mas daghang vacuum-packed nga bugas alang sa populasyon nga naapektuhan sa kalamidad.
Si Cajipe nagpasalamat sa LDS sa ilang maayong buhat, tungod kay kini makabenepisyo sa daghang mga tawo sa panahon sa katalagman, ug nipadayag nga ang DSWD nagpaabot sa dugang nga kolaborasyon tali sa relihiyusong grupo.
Iyang gidayeg ang LDS tungod sa kadasig ug pasalig niini sa pagbuhat sa maayo ug unsay matarung.
Giila usab niya ang kontribusyon sa mga boluntaryo sa paghimo og gatusan nga mga pakete sa pagkaon sa pamilya nga nakaabot sa lainlaing mga lugar.
Sa iyang welcome message, gipasiugda ni DSWD 7 Director Shalaine Marie Lucero nipasabot nga ang “Buong Bansa Handa”, inobasyon ni Secretary Rex Gatchalian alang sa disaster preparedness nga nagsiguro sa hapsay nga paghatag sa mga kinahanglanon panahon sa kalamidad ug katalagman tungod sa climate change ug human-induced hazards.
Samtang, si DSWD 7 Assistant Regional Director for Administration, Tonyson Luther Lee, Chief Administrative Officer, Engr. Irish Yaranon ug pipila ka mga personahe sa DRMG, Brother Benso E. Tonido, Brother Butch Colipapa, Sister Clyda Teichert, ug Brother Briant Teichert sa LDS, mga trabahante sa VDRC, ug mga boluntaryo ningtambong sa kalihukan.
Ang Gobyerno sa Pilipinas nagtukod og VDRC pinaagi sa DSWD ug Office of Civil Defense, sa pakigtambayayong sa United Nations World Food Programme, niadtong 2016, duha ka tuig human sila nagtukod og network sa disaster response hubs sa tibuok Pilipinas uban sa suporta sa mga gobyerno sa United Kingdom ug Australia.
Giinagurahan niadtong Abril 27, 2016, sa Casuntingan, Mandaue City, kining unang disaster response center sa Kabisay-an gibalhin sa kasamtangang lokasyon niadtong Septiyembre 2017 sa Tingub, Mandaue City.