Sila ang mga Pop Diva niadtong dekada 70 diin sagad nila niretiro ug masakiton na apan ang ilang mga awit naa ra gihapon isip buhing handumanan sa kagahapon. Nia ang atong yukbo-pasalamat sa ilang natampo isip pag-ila sa katakos sa kababayen-an ning International Women’s Month.
DIONNE WARWICK ug MELISSA MANCHESTER: Ang litrato kuha sa Instagram ni Melissa atol sa iyang show sa Carnegie Hall sa miaging tuig diin guest niya si Warwick. Si Manchester, 73, ang hitmaker sa If This Is Love, Don’t Cry Out Loud, Midnight Blue ug Through The Eyes of Love (movie theme sa Ice Castles). Si Warwick, 83, kinsa mahinumdoman sa classic hits I’ll Never Love This Way Again ug Déjà Vu aktibo pa sab sa concert tour bisan sa iyang medical issue.
MAUREEN MCGOVERN: Ang legendary singer ang nagpasikat sa movie themesongs nga The Morning After (The Poseidon Adventure), We May Never Love Like This Again (Towering Inferno), ug Can You Read My Mind (Superman). Siya sab ang nikanta sa We Could Have It All ug Very Special Love. Ang 74-anyos niretiro sa Ohio human na-diagnosed og posterior cortical atrophy, usa ka matang sa Alzheimer’s disease niadtong 2022.
ROBERTA FLACK: Siya ang unang artist nga nidaug og back-to-back sa Grammy Award for Record of the Year sa kantang The First Time Ever I Saw Your Face (1973) ug Killing Me Softly With His Song (1974). Siya sab ang original singer sa The Closer I Get To You, If Ever I See You Again ug ang duet nila ni Peabo Bryson nga Maybe ug Tonight I Celebrate My Love. Si Flack, 87, niretiro human na-diagnosed og motor neurone disease nga basi sa healthdirect.gov moresulta sa pagkaparalisar.
DIANA ROSS: Ang most successful female performer of all time sa The Guinness Book of Records nga naglakip sa Touch Me In The Morning, Do You Know Where You’re Going To, It’s My Turn, Endless Love (with Lionel Richie) ug When You Tell Me That You Love Me. Ang Michigan-based singer mag-80 anyos na sa Marso 26 ug busy karon sa iyang The Music Legacy Tour.
LINDA RONSTADT: Ang 11 Grammy Award singer niretiro sa San Francisco, California apan wala siya sukad makasal ug wala sab makabaton og anak. Apan duna siyay duha ka mga sinagop. Ang 77-anyos wala na mokanta sukad na-diagnosed og neurological disorder niadtong 2019. Lakip sa iyang biggest hits ang Blue Bayou, It’s So Easy, Hurt So Bad, Don’t Know Much (with Aaron Neville) ug Somewhere Out There (with James Ingram).
MARY MACGREGOR: Ang iyang mga kanta sikat gihapon labi na sa mga Pinoy. Kinsa may wala ma-in love sa iyang Torn Between Two Lovers, This Girl Has Turned Into A Woman, Good Friend ug The Wedding Song (There is Love)? Ang 75 anyos nga legendary singer niretiro na sa California kauban ang iyang ikaduhang bana ug duha ka mga anak. / MGA LITRATO GIKAN SA FB, IG, LAST.FM