Dili tingali paigo ang usa ka pahina kon atong usa-usahon ang iyang mga natampo sa natad sa kalingawan ug ingon man ang iyang mga nahimo sa komunidad.
Sa liboan ka mga higayon nga akong nakauban si Roger morag makalibog kon asa ba ko magsugod.
Apan kay hilig siya mokanta sa buhi pa, tugoti nga ako ning sugdan sa usa ka awit. “Sugbo harang kapupud-an sa habagatan, kinapusorang lalawigan sa Kabisay-an…”
Mao ni ang unang mga linya sa `Sugbo hymn’ nga gitagik ni Roger Serna isip co-lyricist nga gisagop sa Cebu Provincial Board niadtong 2006 nga hangtod karon gikanta sa tanang public schools.
Dihang ako siyang gipangutana, “Ikaw diay nag-compose ana, `ger?” Usa lang ka tam-is nga pahiyom ang iyang gibuhian dungan sa pagpamuwak sa iyang mga aping.
Si Roger yano lang nga pagkatawo, walay luhong sakyanan ug walay daghang arte sa lawas. Apan puno sa pagmaya ug pagmahal sa mga higala.
Maayo siyang makighugoyhugoy dili lang sa showbiz ug kaubanan sa buhat apan bisan sa ubos nga hut-ong sa katilingban isip sakop sa “Oasis of Love.”
Daghan sab siya og gipauso sama pananglit dihang gibunyagan niya og “Mother Lily of Cebu” si Ms. Rosemarie Gaisano ug “promo diva” o “promo queen” ang movie promoter nga si Ms. Josie S. Pereyra.
Siya sab ang nagbunyag sa among musical trio nga “Press Kit.” Bisan kadiyot ra mi nagkagrupo apan tataw nga way kabutangan sa iyang kalipay, sama dihang nanganta mi sa 18th Cebu Pop Music Festival niadtong 1999 ubos sa pagdapit ni anhing Cesar Las Piñas.
Aduna to’y panahon nga nagkasilingan mi ni Roger sa dihang nagpuyo pa mi sa dalan Junquera Ext. ug kuntento na kaayo siya sa usa ka botelyang beer sa paborito namong tambayan.
Naa say higayon nga nahimo siyang emosyonal dihang didto mi sa Manila sa imbitasyon sa GMA-7 tungod sa pasundayag nga nakapahinumdom niya sa iyang inahan.
Bisan ang mga kanhi kawani sa Vistas Magazine nga maoy iyang first job, isip contributing writer human siya nigradwar sa Southwestern University, nakalitan sa iyang pagpanaw.
Dihang nahimong Sun.Star ang Vistas Magazine niadtong Nobiyembre 25, 1982, si Roger ang usa mga nahimong staff sa ilang accounting department sud sa unom katuig.
Si Roger ang entertainment columnist (Sounds and Images) sa dihang na-hire ko sa kanhi Sun.Star Daily (nga karon Sun.Star Cebu na) niadtong Mayo 16, 1987 ug siya ang labing unang kolumnista sa Laysho (Kyaw-Kyaw) dihang nahimugso ang Superbalita Cebu niadtong Oktubre 23, 1994.
Si Roger nahimo usab nga leisure editor sa kanhi Newstime sa wala pa siya nibalhin sa Provincial Information Office sa Cebu Province diin siya nahimong Information Officer ug dayon Administrative officer hangtod na sa iyang pagretiro.
Bisan kon senyor na, aktibo gihapon ni isip executive assistant sa Oslob Mayor’s Office ug sakop sa ilang parish choir.
Niadtong Agusto 23 hingpit siyang nanamilit sa edad nga 67 tungod sa cardiac arrest. Nawala man siya apan ang iyang mga handumanan magpabilin sa among kasingkasing.
Akong yukbo diha kanimo, 'ger!