Ang “Basin Maybe” mao ang debut single sa Cebu’s rising boyband nga “Kinto Boys” nga kusog karon sa mga batan-on.
Ang “Basin Maybe” naghubit sa gugma ug kalipay nga makalingaw paminawon nga dunay tono nga dali ra’ng mahinumdoman.
Nia ang tipik sa iyang mga titik:
“Di na ta magmaoy ha/
“I think mao na ni/ It’s time for
a change...
“Baby/ basin maybe/
“Basin duna pa’y possibility/
“Ma-ha-ha-happy na tingali/
“Basin, maybe…”
“This song is about embracing possibilities,” matod pa sa award-winning songwriter, record producer ug musical ug stage director nga si Jude Gitamondoc.
“It’s a reminder to take a chance on happiness, love, and whatever life brings.”
Ang Kinto Boys mao ang bag-ong pambato sa Vispop nga giduma ubos sa Kadasig, ang record label nga gipanag-iya ni Gitamondoc.
Ang ilang catalog naglakip sa Cebuano hits sama sa “Hahahahasula,” “Pero Atik Ra,” “My Morena Girl,” “Baga Ka’g Face,” “Ipanumpa Ko,” ug “Ihatod Tika,” nga gikanta sa mga sikat nga Cebuano artists sama nilang Kurt Fick, Jacky Chang, Medyo Maldito, Jerika Teodorico, ug Oh! Caraga.
Si Gitamondoc mao usab ang composer sa bag-ong kanta karon ni Morissette nga “Ihilak Lang Na” nga gi-released niadto lang Disyembre.
Ang 45-anyos nga multi-talented Cebuano artist busy usab sa iyang latest musical play nga “Hopeless Romantics, Inc.” nga buksan na sa publiko sugod ugma, Pebrero 21 to 23 sa University of the Philippines Cebu Performing Arts Hall.
KINSA ANG KINTO BOYS?
Ang pangalan sa Kinto Boys gikuha sa numero sa distrito nga ilang gigikanan nga mao ang Cebu’s 5th District.
Sila mao si Sinulog Idol alumni Shim Dagatan (Danao), Yad Robal Jayme (Liloan), Kiery Segayle (Compostela), ug Raffy Buanconsejo (Carmen).
Ang Kinto Boys unang nag-krus ang dalan niadtong Pebrero 16, 2024, atol sa “Biyahe sa Kinto Distrito 2024” event sa Robinson’s Galleria diin sila ni-perform isip soloista.
Apan paglabay sa usa ka buwan, subli silang nag-abot sa usa ka event sa Bohol diin sila giabibahan sa crowd tungod sa ilang talagsaong talento ug katakos sa pag-awit.
Dili ikalimod nga duna silay chemistry ug dinhi nahimugso ang ilang grupo.
Ang “Basin Maybe” mahimo nang ma-stream sa Spotify, Apple Music, ug YouTube Music sugod niadtong Pebrero 10.
LABEL PROFILE
Ang Kadasig gitukod ni Jude Gitamondoc niadtong 2019 nga nagsugod isip crowdfunding campaign nga karon usa na ka independent record label nga mo-produce, publish, distribute, ug promote og original Bisaya music nga nagbasi sa Cebu City.
“I used the Hahahahasula serye album to raise funds to start up a small record label dedicated to local artists and Bisaya songs,” pagbalik-lantaw ni Gitamondoc sa Super Ka! sa Superbalita.
Ang ilang team gilangkuban sa producers, arrangers, session musicians, ug vocal talents sa mga inila ug dagkong brands sama sa Rejoice, Aboitizland, RAFI, SM Seaside Cebu, Visayan Electric ug daghan pa.
Gawas sa Kadasig, si Gitamondoc mao usab ang co-founder sa Visayan Pop Songwriting Campaign nga usa na karon ka institusyon sa pop-sounding Cebuano music.