Ciar: It's Showtime kinsay nabulahan ABS-CBN o GMA?

Tinuod suwerte ang Kapamil­ya noontime show nga nakaki­ta og bag-ong pinuy-anan sa GMA-7 apan duna sab diay ni mga negatibong aspeto.

Sama pananglit, ang pagdili sa mga host sa It’s Showtime nga maghisgot o mag-promote og mga programa nga kakumpetensiya sa Kapuso Network.

Mao ni ang nabantayan sa Madlang Pipol sa nangaging episode dihang gihunghongan ni Kim Chiu si Amy Perez nga giingong dili pahisgotan ang “Linlang” sa ilang noontime show ug ang paggawas ni Kim isip Star Patroller sa TV Patrol.

Ang “Linlang” nga gibituonan ni Kim ug Paulo Avelino, parehong makita sa TV5 ug A2Z samtang ang TV Patrol mao ang halos upat ka dekada nang flagship newscast sa ABS-CBN nga makita sa A2Z.

Kon dili puwede hisgotan sa GTV, samot na tingali kon naa na sila sa GMA-7?

Samtang wala matino kon mao ba sab sa kaso sa Kapuso stars, apan isip co-production, gipaabot ang pagdagsang sa mga GMA Sparkle Artist sa It’s Showtime isip Madlang Kapuso, guest o co-host.

Sa kasamtangan, dunay 17 ka mga host ang It’s Showtime ug halos dili na gani katingog ang uban sa kadaghan nila, unsa kaha kon pun-an pa?

Apan bisan kinsa pa’y ilang ipuno, dili malalis nga si Vice Ganda ang dugo ug kinabuhi sa show.

WALAY IDENTITY

Ang gihimo sa GMA karon nagpakita lang nga wala silay lig-ong programa nga puwede nilang ihulip sa nabakante nilang noontime show nga nagkinahanglan og solidong chemistry sa mga host.

Nagpakita sab ni nga luyo sa ilang pagka-No.1 TV channel ug bisan sa ilang franchise, wala silay kaugalingong noontime show hangtod karon. Ang Eat Bulaga gi-produced kanhi sa Tape, Inc.

Kini kon itandi sa ABS-CBN nga maoy producer sa pipila sa longest-running noontime shows sama sa “Magandang Tanghali Bayan”, “Wowowee” ug karon “It’s Showtime” nga mag-15 na katuig.

Ang variety television shows tradisyon na nga maoy moukopar sa noontime slot sukad pa niadtong 1958 diin mahilambi­git ang masa pinaagi sa mga contest, pasiaw ug kultura isip kabahin sa “channel branding” o “channel’s identity.”

UNSAY KUMPLIKASYON?

Karon nga naa na ang It’s Showtime sa GMA, posible bang mogawas si Vice Ganda sa programa ni Jessica Soho kinsa grabeng nasakitan sa “rape joke” niadto ni Vice.

Wala na ba mahiubos ang GMA sa magtiayong Ogie Alcasid ug Regine Velasquez human sila kalit nanglayat sa ABS-CBN niadtong 2013? Aduna kahay purohan nga mag-uban ang ex-couple nga si Kim Chiu ug Xian Lim sa usa ka TV show?

Ug sa pagsud sa GMA Sparkle Artists sa It’s Showtime, unsay epekto niini sa Kapamilya?

Samtang sa taping sa It’s Showtime hosts sa “Family Feud” nga ipagawas sa Abril 8, wala si Karylle. Sayod ta nga dili maayo ang break-up nila ni Dingdong Dantes tungod sa third party issue.

Makatrabaho ba sila og tarong kon ingon aning duna silay isyu sa mga personalidad sa GMA? Hangtod kanus-a sila magkinto ug magpa-itoy-itoy?

Di kaha magda lang ni og tigaw sa mga host sa It’s Showtime nga nakabarog bisan walay prangkisa ug bisan niadtong panahon sa pandemiya?

POSITIVE SIDE

Ang nakaayo hinuon sa collaboration kay mokunhod ang production cost kay duha na man silang mag-abaga ug ang posibleng pagsaka sa advertising revenue tungod sa mga channel nga mapuno.

Magbukas sab ni og bag-ong market dili lang sa mga advertiser kundi sa mga artista tu­ngod sa makuha nilang dugang mileage sa mga lugar diin kusog ang Kapuso sama sa Greater Manila Area o sa mga probinsya diin kusog sab ang Kapamilya.

Gawas sa GMA-7 ug GTV, ang It’s Showtime padayong makita sa A2Z, local cables, TFC ug GMA Pinoy TV ug ubang social media platforms. /