Ciar: Kinsa sila? Iconic songs nga pangan sa tawo ang taytol

Nasayud ka ba nga ang ngan sa tawo nga gigamit sa taytol aning mga kantaha gikan sa ti­nuod nga hitabo o personal nga kasinatian? Basaha ang nagli­min nga istorya sa ilang ngan.

DEAR JOHN / Taylor Swift

Ang Dear John nga gikan sa third album, Speak Now ni Taylor Swift niadtong 2010, gituohan nga iyang “goodbye letter” sa rumored boyfriend nga si John Mayer. Si Swift 19 anyos lang dihang na-link ni sa American heartthrob nga 32 na niadtong higayuna.

HEY JUDE / The Beatles

Ang 1968 signature hit sa The Beatles gi-composed ni Paul McCartney nga ang original title “Hey Jules” nga inspired sa 5 anyos nga anak ni John Lennon nga si Julian, kinsa nasubo dihang nagbuwag ang iyang mga ginikanan. Giusab ni sa Hey Jude tungod kay mas nindot paminawon.

AUBREY / David Gates

Ang ‘Aubrey’ gi-composed ni American singer-songwriter David Gates human siya nitan-aw sa pelikulang “Breakfast at Tiffany’s” nga gibi­tuonan ni Audrey Hepburn. Ang pangan ni Audrey ang nahimo niyang inspirasyon sa Aubrey nga gi-record ni Gates ug sa iyang bandang Bread niadtong 1972.

BEN / Michael Jackson

Ang “Ben” ang unang No. 1 single ni Michael Jackson isip solo artist sa edad nga 14 niadtong 1972. Ang “Ben” ang theme song sa pelikula nga dunay susamang ulohan nga sequel sa 1971 horror film “Willard” nga naghubit sa paghinigalaay tali sa bata ug sa iyang binuhi nga ilaga nga si “Ben.”

CAROLINA IN MY MIND / James Taylor

Ang gipasabot ni James Taylor nga ‘Carolina’ mao ang Chapel Hill, North Carolina diin siya nidako. Nasuwat niya ang maong awit tungod sa iyang kamingaw dihang nibiya siya sa maong dapit aron manimpad. Ang `Carolina in my Mind’ ang ikaduhang single sa iyang 1968 self-titled debut album.

MY SHARONA / The Knack

Ang 1979 debut hit single sa American rock band The Knack gi-composed ni lead vocals-guitarist Doug Fieger alang sa teenager niadto nga si Sharona Alperin kinsa nahimo niyang hinigugma. Si Fieger namatay sa brain tumor ug lung cancer sa edad nga 57 niadtong 2010. (Ma­kita sa litrato si Fieger ug Sharona nga gikan sa groovyhistory.com.)

BULOY / Parokya ni Edgar

Ang “Buloy” gitagik ni Chito Miranda isip unang single sa Parokya ni Edgar niadtong 1996. Basi sa Facebook page sa maong banda nga si Buloy suod nilang higala nga Fine Arts student sa FEU ug nigawas pa sa music video sa maong awit. Sagad sa mga titik niini dili tinuod. Apan wala nila damha nga natinuod human nagpakamatay si Buloy.

ANNA / Apo Hiking Society

Sa iyang 45th Anni­versary Con­cert, gikumpirmar ni OPM hitmaker Louie Ocampo nga ang kantang “Anna” (nga gipasikat sa Apo Hiking Society) ug ang “Tell Me” (Joey Albert) parehong inspired sa iyang ex-girlfriend nga si Anna niadtong 1983. / Mga litrato gikan sa FB, IG