Karong nakuha na sa “ChaRes” duo nga silang Charlie Fleming ug Esnyr Ranollo ang unang spot sa Big Four sa Pinoy Big Brother: Celebrity Collab Edition, kinsa pa kaha ang laing makasulod?
Ang nahibiling tulo ka spot sa Big Four ang gikatakdang ilogan pinaagi sa “3 Big Jump Challenges.” Sa ato pa, wala nay mahitabong nominasyon ug botasyon kay ipaagi ni karon sa katakos ug diskarte sa nahibiling duos.
Sukwahi ni sa mga nangaging edisyon nga gibase sa online votes ang pagpili sa Big Four.
Giusab karon tungod tingali sa nadawat nilang grabeng saway nga nahimo nang “money contest” ang PBB nunot sa pagkatsugi nilang Klarisse ug Shuvee nga mas deserving unta.
Apan karong wala na silang Klarisse ug Shuvee, kinsay inyong bet mahimong Big Winner atol sa Big Night karong July 5? Nia ang atong mga panahom:
AZVER (AZ ug River)
Karon nga ipaagi na sa challenges ang pagpili sa nahibiling tulo ka spot sa Big 4, ang tandem nilang AZ Martinez ug River Joseph ang namiligro. Kay sa tanang duo sila ang dili competitive. Sayang si River kon dili makasulod kay naa sab niya ang mga hiyas sa usa ka buotan nga housemate.
RAWI (Ralph ug Will)
UPDATE: Niadtong Martes, ang “RaWi” na ang ikaduhang nakasulod sa Big 4 human silay nidaog sa unang Big Jump Challenge. Apan sukad nakabalik si Ralph de Leon via wildcard, daw sa nausab na ang iyang batasan. Sa atong panahom, maayo na kaayo kon silay makakuha sa 2nd runner-up.
CHARES (Charlie ug Esnyr)
Bisan walay nipili ni Esnyr nga final duo, iyang gipamatud-an nga dili lang ang pagka-competitive ang sukaranan aron makasulod sa Big 4. Siya ang “happy pill” sa Bahay ni Kuya. Mao nga dili ikahibong kon sa Big Night, mada niya sa kahig ang ka-duo nga si Charlie isip Big Winner. / PHOTOS: ABS-CBN
DUSBI (Dustin ug Bianca)
Ang sobrang PDA (public display of affection) nilang Dustin Yu ug Bianca de Vera ang downside ning ilang loveteam. Birada pa lagi ni Klarisse: “OA!” Adunay chika nga nigasto na ang ilang fans og 8 digits aron lang dili sila ma-evict. Apan bisan kuwartahan pa, dili sila pang-Big Winner material.
BREKA (Brent ug Mika)
Daghan og similaridad silang Brent Manalo ug Mika Salamanca. Apan ang ilang pagkabuotan ug sobra ka mapailubon mura ba og “too good to be true.” Klaro kaayo mao nga walay niboto bisag usa sa “BreKa” ug “DusBi” gikan sa housemates kay wala nila ang hiyas sa usa ka Big Winner.