Makadungog lang ka aning sakita mura na ka og mangurog sa kahadlok. Base sa Mayo Clinic, ang cancer mahimong hereditary apan dili gyud maoy common cause. Sa showbiz, ania ang pipila sa mga dunay family history sa maong sakit.
GINA LOPEZ
Ang environmentalist nga si Gina Lopez nabugtoan sa brain cancer sa edad nga 65 niadtong 2019. Samtang ang iyang papa nga si Eugenio Lopez Jr., ug lolo nga si Eugenio Lopez Sr., nga tag-iya sa ABS-CBN parehong nangamatay sab sa cancer.
TIRSO CRUZ III
Si Tirso Cruz III na-diagnosed og stage 2 lung cancer niadtong 2014. Apan kon si Tirso naka-survive, ang iyang anak nga si Teejay nakabsan gyud niadtong 2018 sa edad nga 37 tungod sa lymphoma.
GARY VALENCIANO
Gihulagway ni Gary V. nga “walking miracle” ang iyang kinabuhi human siya naluwas sa kidney cancer nga nadiskubre pila ka adlaw human sa iyang open heart surgery niadtong 2018. Ang iyang papa nipanaw sa cancer niadtong 2013.
MICHAEL BOLTON
Ang iconic singer nga si Michael Bolton nakigbatok karon sa “glioblastoma” nga usa ka agresibong matang sa brain cancer. Hangtod karon kanselado ang tanan niyang shows. Ang iyang maguwang gituohang nipanaw sab sa cancer niadtong 2023.
MELISSA DE LEON
Usa ka breast cancer survivor ang kanhi aktres nga si Lara Melissa de Leon kinsa igsuon nilang Pinky ug Christopher de Leon. Apan ang ilang mga ginikanan nga silang Gil de Leon (bone marrow) ug Lilia Dizon (lung) parehong wala na maluwas.
RICKY DAVAO
Si Ricky Davao nitaliwan sa kumplikasyon sa cancer sa edad nga 63. Apan ang iyang papa nga si Charlie Davao nipanaw sab diay sa colon cancer niadtong 2010 sa edad nga 75.
OLIVIA NEWTON JOHN
Ang British ug Australian singer-aktres nga si Olivia Newton John namatay sa breast cancer. Ang iyang igsuon nitaliwan sab sa brain cancer samtang ang ilang amahan sa lung cancer. / Add’l references: Wikipedia, ABS-CBN, GMA, Pep.ph, FB