Nagpahilom-hilom lang apan nasayod ka ba nga mga pageant titleholder ni sila sa wala pa nahimong artista? Tan-awa kon kinsa ug unsay ilang mga titulo.
CHARO SANTOS
Sa wa pa nikulit og pangan sa TV ug pelikula, si Charo nabantog na nga rayna sa mga beauty pageant. Lakip sa iyang mga titulo ang Miss Calapan 1969, Manila’s Five Prettiest, Miss Green Race 1974 ug Miss Baron Travel Girl 1976.
SUSAN AFRICA
Human nidaug isip first runner-up sa 1980 Binibining Pilipinas, nibaha ang mga proyekto ni Susan nga naglakip sa 1992 teleserye nga “Mara Clara” diin mas nisidlak ang iyang acting career.
JEAN SABURIT
Si Jean Saburit nakoronahan isip Binibining Pilipinas-Young sa edad nga 19 niadtong 1975. Sama nilang Charo Santos ug Susan Africa, si Jean nigawas usab sa ABS-CBN’s “Batang Quiapo”.
ELIZABETH OROPESA
Gamit ang iyang tinuod nga ngan nga Elizabeth Freeman, si Oropesa nidaug isip Miss RP Luzon 1972. Apan ang iyang titulo gibawi human nadiskubre nga gipeke niini ang iyang edad. Nasuta nga dili siya 18 kundi 15 anyos pa lang.
LIZA DIÑO
Sa wala pa nag-artista, nahimong government official, ug kapikas karon ni Aiza Seguerra, si Liza Diño, 43, ang Mutya ng Pilipinas 2001 runner-up ug 2007 Miss Philippines-Earth finalist.
LIZA LORENA
Si Elizabeth Ann Jolene Winsett sa tinuod nga kinabuhi ang Binibining Pilipinas 1966 first runner-up. Si Liza Lorena ang inahan ni Tonton Gutierrez nga maoy bunga sa pagminahalay nila ni Eddie Gutierrez. Si Tonton natawo duha ka tuig human sa maong pageant.
TETCHIE AGBAYANI
Si Tetchie ang 1979 Mutya ng Pilipinas Tourism. Niapil usab ni sa 1978 Binibining Pilipinas diin siya napiling Miss Close Up Smile ug usa sa mga semi-finalist. Siya ang unang Pinay nga nahimong cover sa 1982 German edition sa Playboy.
MARINA BENIPAYO
Si Marina Benipayo mao ang Binibining Pilipinas-Maja 1992. Apan dili sa Binibining Pilipinas Maja siya gipada kundi sa Miss World pageant isip hulip sa nasakit nga kandidata. Katapusan niyang TV project ang “Batang Quiapo” ni Coco Martin.