MIKE ENRIQUEZ
Ang GMA radio ug TV newscaster gioperahan na sa kasingkasing (2018) ug nagpa-kidney transplant (2021). Apan niadtong Agusto 29 nitaliwan sa edad nga 71 tungod sa cardiac arrest.
ANGELA PEREZ
Ang kanhi sexy actress nakabsan sa edad nga 55 niadtong Marso 29 tungod sa stroke. Una siyang nigawas sa pelikulang “Laruan” (1983) samtang katapusan niya ang “Akyat Bahay Gang” (1988).
ANGIE FERRO
Ang beteranang aktres nitaliwan niadtong Agusto 17 sa edad nga 86 tungod sa katiguwangon. Naila nga “Lola Igna” nga maoy ulohan sa iyang 2019 indie film diin siya nidaug nga Best Actress.
JAYMEE JOAQUIN
Nagsugod isip aktres sa ABS-CBN apan nisikat isip anchor sa “Games Uplate Live” nga dunay tagline nga “Kabagang” (2006). Si Jaymee nabugtoan niadtong Oktubre 18 sa edad nga 44 kun pito katuig human ni na-diagnosed sa breast cancer.
JOEY PARAS
Ang aktor ug komedyante namatay niadto lang Dominggo (Okt. 29) sa edad nga 45. Si Paras katulo na gioperahan sa kasingkasing. Lakip sa iyang pelikula ang “Bekikang” ug “Last Supper No. 3” diin siya ang bida. (Mga litrato gikan sa Facebook ug Instagram)
JOHN REGALA
Usa sa mga sikat nga kontrabida sa Pinoy movies. Apan sa pagkawala sa action films, si Regala nawad-an usab og trabaho. Ang aktor namatay sa cardiac arrest sa edad nga 58 niadtong Hunyo 3.
MARIO DUMAUAL
Ang beteranong entertainment reporter sa ABS-CBN giataki sa kasingkasing niadtong Hunyo ug namatay sa septic shock sa edad nga 64 niadtong Hulyo 5.
PATRICK GUZMAN
Ang Canadian-Filipino actor ug ‘90s heartthrob naila sa mga pelikulang “Una Kang Naging Akin” ug “Koronang Itim.” Namatay sa heart attack niadtong Hunyo 15 sa edad nga 56.
RICKY RIVERO
Ang aktor-direktor nitaliwan sa edad nga 51 niadtong Hulyo 16 human ni na-stroke niadtong Mayo. Si Rivero na-stroke niadtong 2015 apan naka-recover pa.
ROBERT AREVALO
Ang beteranong aktor malinawon nga nanamilit sa edad nga 85 niadtong Agusto 10 tungod sa Parkinson’s Disease. Katapusan siyang nigawas sa TV series nga “FPJ’s Ang Probinsiyano.”
WILLIE NEPOMUCENO
Ang sikat nga impersonator namatay sa edad nga 75 niadtong Hulyo 26 kun duha ka adlaw human siya nahug sa katre ug nasamad ang ulo.
Mga pangaliya sa malinawon nga pagpanaw sa mga Filipino celebrity nga gikuha na sa kahitas-an karong tuiga subay sa atong paghandom sa Adlaw sa Minatay.
