Sa dili pa ang gikahinaman nga Big Night sa Pinoy Big Brother (PBB): Celebrity Collab Edition, nia una ang gamayng pasulit aron pagsukod kon fan ba gyud ka og PBB.
Q: Kanus-a ug kinsay nagmugna sa Big Brother?
A: Una ning nigawas sa Netherlands niadtong 1999 nga gimugna ni John de Mol Jr. kinsa mao say naghimo sa mga reality show nga “The Voice” ug “Star Academy” ug game show nga “Deal or No Deal.”
Q: Kinsa ang nagpaluyo sa tingog ni “Kuya” sa Pinoy Big Brother?
A: Public knowledge na nga si Laurenti Dyogi ug nga aduna siyay voice double aron mohulip kon wala siya. Si Dyogi ang executive producer ug dunay creative control sa maong reality show.
Q: Pila na ka tuig ang PBB?
A: Ika-20 na katuig karon sa PBB nga nag-premiere niadtong August 21, 2005, sa ABS-CBN. Samtang ang PBB Celebrity Collab mao ang ilang ika-18 nga edisyon.
Q: Pila kabuok PBB Big Winner nga Bisaya?
A: Sa 18 ka mga Big Winner, upat niini gikan sa Kabisay-an samtang pito sa Mindanao.
Q: Kinsa ni sila?
A: Sa Kabisay-an mao silang Kim Chiu, Keanna Reeves, Slater Young ug Yamyam Guc-ong. Samtang sa Mindanao, mao silang Nene Tamayo (First ever Big Winner), Ruben Gonzaga, Ejay Falcon, Melai Cantiveros, Maymay Entrata, Liofer Pinatacan, ug Anji Salvacion.
Q: Kinsa ang ex-housemate nga namatay?
A: Si Kigoy Abarico, ang “Bay Diskarte ng Ormoc” sa Season 4 Unlimited, ang labing unang housemate nga nipanaw sa PBB franchise sa edad nga 36 niadtong 2016 tungod sa cardiac arrest.
Q: Tinuod ba adunay 42 kabuok CCTV camera ang PBB House?
A: Walay gibutyag kon pila gyud kabuok apan gituohang mas daghan pa. Ang camera sa banyo ug kasilyas gituyo aron ma-monitor kon ugaling dunay dautang buhaton ang housemate sa iyang kaugalingon.
Q: Aduna na bay ni-leak nga video o litrato sa housemate nga naligo?
A: Wala. Apan sagad sa mga ex-housemate nga nainterbyu dili sila maghukas tanan kon maligo.
Q: Kinsa ang mga housemate nga wala kasuway ma-nominate for eviction nga nahimong ultimate grand winner?
A: Sa atong nahibaw-an, tulo ra. Kini mao silang Kim Chiu (PBB First Teen Edition), Maymay Entrata (PBB Lucky 7) ug Liofer Pinatacan (PBB Connect). Kon ang ChaRes ang modaug sa PBB Collab, si Esnyr ang ikaupat tungod kay wala sab siya kasuway ma-nominate for eviction.
Q: Kinsa ang iproklamar nga Big Winner karong Hulyo 5?
A: Dako og purohan ang duo nga ChaRes tungod sa pagka-loveable ni Esnyr. Sa ilang kadaugan maabsuwelto sab ang management batok sa mga akusasyon nga nahimo nang “money contest” ang PBB tungod kay si Charlie ug Esnyr parehong kabos ug breadwinner.