Sa sunodsunod nga pagpanaw sa mga music legend, tan-awa kon kinsa pa ang mga may seryusong sakit karon nga maoy nagtukmod nila nga moretiro na lang.
NEIL DIAMOND, 84 anyos
Ang legendary singer-songwriter wala na mokanta sukad ni na-diagnosed og Parkinson’s disease. Basi sa Mayo Clinic ang Parkinson usa ka `movement disorder’ sa nervous system. Lakip sa mga sintomas niini ang speech problem, involuntary movement ug memory loss. / Photo: NeilDiamond FB
LINDA RONSTADT, 78
Ang nailang “The Queen of Country Rock” niretiro human naapektohan ang iyang pag-awit sa sakit nga Parkinson’s disease. Nisamot pa ang iyang kalbaryo human nasuta nga usa ni ka Progressive Supranuclear Palsy (PSP) nga gihulagway nga mas agresibo pa sa Parkinson. / Photo: Today.com
PHIL COLLINS, 74
Ang eight-time Grammy winner magsungkod na molakaw kondi man gani mag-wheelchair. Ang legendary drummer wala nay planong mobalik og tukar tungod sa nerve damage sa iyang kamot. Nag-antos ni sa kumplikasyon sa operasyon sa iyang spinal injury ug duna ni type 2 diabetis. / Photo: Wikipedia
STEVEN TYLER, 77
Ang bandang Aerosmith nianunsyo sa ilang retirement tungod sa pagkaangol sa tutonlan sa ilang lead singer nga si Steven Tyler. Gituohang napuwersa ni sa concert tour nila niadtong 2023 ug hangtod karon wala na gyud maulian pa. / Photo: People.com
STEUART SMITH, 72
Ang long-time guitarist sa bandang Eagles napugos og retiro niadtong Pebrero nunot sa pagka-diagnosed niya og Parkinsonism. Si Steuart Smith nasulod sa Eagles pag 2001 isip hulip ni founding member Don Felder kinsa mahinumdoman sa iyang guitar solo sa “Hotel California.”/ Photo: FansofSteuartSmith FB
HUEY LEWIS, 74
Ang American singer, songwriter ug actor niretiro human nakumpirmar nga duna ni “Meniere’s disease,” usa ka matang sa sakit sa dunggan nga maoy nakaingon sa iyang pagkabungol ug ubang mga sintomas. Lakip sa iconic hits ni Huey Lewis ang “The Power of Love” ug “Cruisin” nga duet nila ni Gwyneth Paltrow./ Photo: GettyImages
OZZY OSBOURNE, 76
Ang `70s heavy metal band Black Sabbath vocalist mianunsyo sa iyang retirement gumikan sa mga health issue nga naglakip sa Parkinson’s disease ug upat ka mga operasyon sa iyang spinal injury. Karong July 2025, si Ozzy Osbourne ug ang orihinal nga Black Sabbath gitakdang mohimo sa ilang final show sa England./ Photo: RollingStone