Gone but not forgotten! Ang mga musikero nga nakatampo og dako sa kalambuan sa musika apan usa-usa nang nanamilit karong tuiga. Rest in peace ug salamat mga idol!
TITO MINA
Si Tito Mina ang usa sa mga nag-pioneer sa `70s Manila Sound ug ang James Taylor of the Philippines. Lakip sa iyang iconic hits ang Ikaw Pa Rin, Both In Love, Honey ug Got To Let You Know. Taliwa sa iyang kasikatan, nilangyaw ni sa Luxembourg diin niya nahimamat ang nahimo niyang kapikas. Si Tito nipanaw niadtong Abril 10 sa Espanya tungod sa heart attack. / Litrato sa FB
ERNIE DE LA PEÑA
Ang singer-songwriter nga si Ernie de la Peña ang henyo sa Pinoy Music. Mokabat sa 300 ka mga awit ang iyang nahimo nga naglakip sa OPM hits ni Rico J. Puno sama sa Kapalaran (FPJ’s Batang Quiapo themesong), Ang Tao’y Marupok, May Bukas Pa, ug Lupa (3rd prize sa 1979 Metropop). Siya sab ang lyricist sa Kawawang Cowboy (Fred Panopio), Ang Pag-ibig Kong Ito (Leah Navarro), Araw-Araw, Gabi-Gabi (Didith Reyes), Magsayawan (VST & Co.) ug Magkaisa (Virna Lisa). Si Ernie nitaliwan niadtong Marso 12 sa edad nga 91. / Litrato sa FB
JOSEPH ALDANA
Siya ang lead singer sa `90s OPM band nga Rockstar 2 nga nisikat sa Pinoy Jukebox songs sama sa Ika’y Mahal Pa Rin, Bakit, Mahal Kita, Alam Mo Ba?, ug I’m Sorry My Love. Si Joseph nabugtoan niadtong Pebrero 22 sa edad nga 55 tungod sa brain aneurysm. Ang Rockstar 2 giporma ni OPM hitmaker Vehnee Saturno isip kaatbang niadto sa April Boys. / Litrato sa FB
DAVID SOUL
Ang American-British singer-songwriter-actor ang nagpasikat sa kantang Don’t Give Up On Us nga nag-No. 1 sa 1977 US Billboard. Si David mahinumdoman usab sa American TV series nga “Starsky & Hutch” pag-1975 ug pelikulang “Magnum Force” ni Clint Eastwood. Si David namatay sa edad nga 80 niadtong Enero 4 tungod sa pulmonya. Sa miaging katuigan gitangtang na ang usa niya ka baga tungod sa cancer. / Litrato sa Wikipedia
C.J. SNARE
Si Carl Jeffrey “C.J” Snare ang American vocalist, songwriter ug founding member sa `90s rock band nga Firehouse. Apan niadtong September 2020, si C.J. na-diagnosed og stage 4 colon cancer. Gusto pa unta niyang mobalik og kanta apan niadtong Abril 5 nakabsan ni sa edad nga 64. Lakip sa signature hits ni C.J. sa Firehouse ang I Live My Life For You, Here For You, When I Look Into Your Eyes, Love Of A Lifetime, ug You Are My Religion. / Litrato sa FB
ERIC CARMEN
Siguradong pamilyar mo sa iyang iconic hits nga All By Myself (1975), Never Fall In Love Again, ug Love Is All That Matters (1977). Si Eric Carmen usab ang nikanta sa Hungry Eyes nga gi-featured sa 1987 film “Dirty Dancing.” Ang American singer-songwriter ug kanhi frontman sa Raspberries nipanaw niadtong Marso sa edad nga 74 atol sa iyang pagkatulog. / Litrato sa IG