Dili pa tingali kaayo pamilyar ang iyang pangalan apan usa siya sa mga fast-rising aktor karon sa independent ug mainstream films.
Usa sa iyang mga bag-ong pelikula ang Cebuano horror movie nga “Balay” nga gikagubtan karon sa BisayaFlix app nga nag-premiere niadtong Agusto 3 sa SM Seaside Cebu Centerstage.
Ang “Balay” naghubit sa karaang panahon niadtong 1950s diin gihatagan ni Eugenio og kinabuhi ang papel ni “Don Mariano” kinsa nag-inusara na lang sa dakong balay human ni gibiyaan sa iyang asawa ug mga anak.
“Grabe ka challenging ang `Balay’ because it’s kinda weird and eccentric. One of the most terrifying scenes for me was the rape and murder scenes,” butyag ni Sol Eugenio sa Superka! sa Superbalita Cebu.
“Hasta ako nakasiyagit gud. Nalimot ko nga apil man diay ko ani. Haha... Dili siya corny nga horror nga magmake-up pa, ang mata ra gyud ni Akiko ang nausab, siga ug puti kaayo.”
Si Akiko Solon sa “Star Power” fame sa ABS-CBN, ang lead star sa “Balay” nga na-possessed og dautang espiritu.
“Kadto akong ginhawa ug grabeng singot while nagkupot og kutsilyo tinuod gyud to. Naa koy na-feel nga lain jud,” paambit ni Sol. Wala hinuon niya gibutyag kon asa ning balaya apan matod niya nga upat tanan ang ilang lokasyon.
Ang “Balay” gibituonan sab nilang Sinulog Idol season 10 finalist Shim Dagatan, Bench model Jessel Regis, ug veteran actress Ligaya Rabago ubos sa sinuwat ug direksyon ni Mr. Universe Philippines 2022 Elcid Camacho.
“We’re happy that this has been approved without cuts by MTRCB. Catch `Balay’ now on BisayaFlix by downloading the app for P99 only and uncover the intriguing twists behind our characters,” dugang sa late-bloomer nga aktor.
UPCOMING PROJECTS
Nindot ang tuig 2025 ni Sol Eugenio kay gawas nga nagbaha ang iyang proyekto, sunodsunod ang iyang mga kadaugan.
Siya ang Best Actor sa Navotas city’s 7th Navoteño Film Festival sa pelikulang “Left Cross” diin siya nidala nga boksidor nga si “Lolo Ric” ug Best Supporting Actor sa 2nd Puregold CinePanalo Film Festival sa pelikulang “Champ Green” sa student category.
Human sa “Balay,” sunod siyang makita sa upcoming project nilang Anne Curtis ug Gerald Anderson ug sa Hollywood movie ni Scott Adkins nga “Prisoner of War.”
“I’ll be playing as one of Anne’s fight buddies. Mao ni akong bangas dili mahimong tangtangon kay naa sa kontrata. While in Prisoner of War, I’m a Japanese soldier who is tasked to behead POWs using the samurai.”
Naa sab siya sa pelikulang “Caraingin” isip si Apo Rosario alang sa Bakunawa Film Festival sa Agusto 27-Sept. 15 ug sa short film “Langgam, Langgam” sa University of the Philippines karong December.
“Mao ni advantage kon makadaog ka’g mga award. Kay before ako pa man guy mag-audition, karon kay sila nay mo-offer nako,” pahayag pa niya.
Kon unsay iyang acting technique, matod ni Sol nga mag-imagine ra siya. “I build my own world aron nuances nako natural ra. But dili ko ganahan mogamit og emotions based from my own personal experiences aron dili ko maapektuhan.”
Sukad nigawas si Eugenio sa international TV series nga “Almost Paradise” niadtong 2020 with Hollywood actor Christian Kane, wala nay hunong ang iyang mga proyekto sama sa star-studded films nga “1521” ug “Elias: Aswang” nga inspired sa urban legend ni Teniente Gimo.
Si Sol natawo ug nidako sa Cainta, Rizal. Nikuha og kursong Aero Engineering major in flying apan wala ni kahuman tungod sa gugma niya sa Performing Arts. Sa edad nga 19, nibalhin ni sa Sugbo ug nahimong pioneer teacher sa kanhi Cora Doloroso Modelling School sa Fuente Osmeña ug isip Ballroom dancer-instructor. /