Nipasidaan si Lapu-Lapu City Mayor Cynthia “Cindi” King-Chan nga ang dili emergency nga tawag ug prank calls sa bag-ong gi-activate nga 911 emergency hotline sa siyudad makahatag og peligro sa kinabuhi sa tawo.
Giawhag sa mayor ang publiko nga gamiton ang serbisyo nga responsable human sa opisyal nga paglusad niini sa miaging buwan.
Ang mga makalapas mahimong mag-atubang og hangtod lima ka tuig nga pagkapriso ug multa nga dili molapas sa P40 mil, sumala sa Department of the Interior and Local Government (DILG).
Gipasiugda niya nga ang maong hotline direkta nga nagsumpay sa mga tawag ngadto sa mga nagkalainlaing ahensiya sa gobiyerno sama sa Philippine National Police, Bureau of Fire Protection, ug mga serbisyong medikal.
“Ayaw gamita ang 911 para sa mga butang nga dili emergency sama sa pangutana lang, reklamo nga dili urgent, o prank calls. Kini makapadugay sa pagresponde sa tinuod nga nanginahanglan og tabang,” matod ni Chan.
Dugang pa niya nga magamit ang hotline nga walay bayad, bisan og walay load sa cellphone.
Giawhag ang mga residente nga motawag sa 911 alang sa mga emerhensya sama sa mga mosunod: sunog, tulis, kawat, pagpamusil, kidnapping ug carnapping; mga aksidente sa kadalanan nga nagkinahanglan og medical o traffic assistance; seryoso nga medical cases sama sa pagkalipong, kalisod sa pagginhawa, aksidente, o stroke; mga sitwasyon nga naghulga sa kinabuhi lakip ang bomb threats, domestic violence, away, o mga hulga sa seguridad; ug mga natural nga kalamidad sama sa linog, baha, landslide, o bagyo.
Ang paghimo og mga prank call sa mga emergency hotline usa ka kalapasan ubos sa Presidential Decree No. 1727, matod sa DILG.
Kini nga balaod partikular nga nagdili sa malisyusong pagpakaylap sa sayop nga impormasyon o mga hulga nga naglambigit og mga bomba, pabuto, o susamang mga himan.
Tumong niini nga mapugngan ang kalisang sa publiko, kalibog, ug kagubot. / DPC