Di na mag-antos sa abugon nga dalan ang mga lumolupyo sa Barangay Hipodromo, Dakbayan sa Sugbo sa higayon nga mahuman na ang pag semento sa circumferential road.
Si Mayor Raymond Alvin Garcia mao ang nangu sa ground breaking ceremony niadtong Biyernes, Abril 25, 2025, alang sa pagsemento sa dan sa Barangay Hipodromo.
Uban ni Garcia sa kalihukan si Konsehal Joel Garganera ug Jerry Guardo, ug ang Kongresista sa North District nga si Rachel “Cutie” del Mar ug ang Kapitan sa Barangay Hipodromo nga si Dondon Bacolod.
Gisaysay ni Bacolod ang mga kalisud nga nasinati sa mga residente sa pag-agi sa abog nga San Antonio St. sa wala pa kini nga proyekto.
Ang proyekto sa pagsemento sa dalan gastuan og P9,960,230.17 ug trabahuon kini sa Win Construction. Ang proyekto gilauman nga mahuman sud sa 360 ka adlaw.
Sa interbyu, gibutyag ni Garcia ang kamahinungdanon sa circumferential road sa Hipodromo nga nagsilbing bugtong agianan alang sa mga motorista.
Matod sa mayor nga mas maayo nga masemento ang dan aron dugay kini nga mapahimuslan kaysa aspaltuhon lang.
“it's very important that the roads here are in good condition... This is a step forward for a long term solution to improving our roads not just yearly asphalt repairs, " matod ni Garcia.
Gitataw sa mayor nga mahinungdanon usab nga ipahiuyon ang proper drainage sa desinyo sa dan tungod sa pagkaduol sa barangay sa usa ka sapa.
Samtang giila ang panginahanglan sa pag-ayo sa daghang mga dalan sa tibuok Dakbayan sa Sugbo, si Garcia wa makahatag kon pila nay nahuman nga gipang-aspalto. / JPS