Nagpadayon sa operasyon ang Mandaue City Government sa mga importanteng opisina ug essential services atol sa busy nga semana sa piyesta.
Kini nga desisyon gihimo aron maseguro’ng mapadayon ang serbisyo sa mga residente bisan pa sa deklarasyon sa special non-working holidays alang sa 48th Asean Summit.
Matod ni City Administrator Atty. Gonzalo Malig-on Jr., nadawat sa City Government ang giusab nga proklamasyon gikan sa Malacañang niadtong Miyerkules sa buntag, Mayo 6.
Nakasulod na sa trabaho ang mga empleyado ug nakasugod na sab og transaksyon ang mga residente sa City Hall sa wala pa niabot ang pahibalo.
Nagpadayon una ang operasyon sa City Government sa wala pa kini nibalhin ngadto sa skeletal workforce alas 10:30 sa buntag.
Ubos sa giusab nga Proclamation 1239, gideklarar sa Office of the President ang Mayo 6 hangtod 8, 2026, isip special non-working days sa Cebu City, Mandaue City, Lapu-Lapu City, ug Cordova alang sa 48th Asean Summit ug uban pang kaubang miting.
Ang orihinal nga proklamasyon naglangkob lamang sa Lapu-Lapu City ug Cordova.
Ang maong deklarasyon gitumong aron mapagaan ang traffic congestion ug mapalig-on ang security measures alang sa mga delegado nga motambong sa summit sa Association of Southeast Asian Nations (Asean). Nadungan ang Asean Summit sa tinuig nga fiesta celebration sa siyudad unya sa Biyernes, Mayo 8.
Nagpagawas si Mayor Thadeo Jovito “Jonkie” Ouano og memorandum nga nagmando nga magpabilin ang skeletal workforce sugod Mayo 6 aron maseguro ang walay hunong nga paghatag sa importanteng serbisyo.
Nagpadayon sa trabaho ang mga personnel gikan sa mga opisina nga nagdumala sa health services, disaster response, peace and order, emergency response, ug traffic management.
Ang pipila ka empleyado nga gi-assign sa Asean-related ug fiesta activities magpabilin sab sa ilang duty sa Mayo 7 ug 8 bisan pa sa holiday declaration.
Lakip niini ang mga trabahante gikan sa City Hospital, City Market, Command Center, City Disaster Risk Reduction and Management Office, ug Traffic Enforcement Agency of Mandaue. / ABC