Si Caitlin Clark miabili sa Women’s National Basketball Association (WNBA) season pinaagi sa ikatulo nga triple-double sa iyang career, ug ang bag-ong porma nga Indiana Fever midominar sa Chicago Sky, 93-58.
Ang WNBA Rookie of the Year sa miaging season mitapos sa duwa og 20 puntos, 10 rebounds, ug 10 assists, ug nagblock og career-high nga upat ka tira.
Si Aliyah Boston midugang og 19 puntos, 13 rebounds, ug lima ka blocks, samtang si Natasha Howard nakaiskor og 15 puntos sa iyang debut para sa Fever.
Si DeWanna Bonner nakaiskor usab og pito ka puntos aron mosaka sa ikatulo nga pwesto sa listahan sa WNBA career scoring, nilabaw kang Tina Thompson. Si Bonner karon adunay 7,489 puntos.
Si Angel Reese nakaposte og 12 puntos ug 17 rebounds para sa Sky, nga napilde sa tulo sa upat ka duwa batok sa Indiana sa miaging season. Si Ariel Atkins midugang og 11 puntos. / RSC