Napahugtan og gamay sa Oklahoma City Thunder ang ilang paggunit sa overall leadership human nila nabuntog ang hosts Los Angeles Clippers, 103-101, ning Lunes, Marso 24, 2025 (PH time), sa National Basketball Association (NBA).
Unom ka mga magduduwa sa Thunder ang ningmugna og dobleng numero nga puntos aron lupigon ang Clippers, nga mao ang posible nilang makontra sa playoffs sa Western Conference.
Ang Thunder ningsulbong sa 59-12 nga rekord samtang ang Clippers nahagbong sa 40-31 nga rekord, ikawalo sa Western Conference.
Nahimo sa Thunder ang kulbahinam nga daog bisan wala ang duha sa ilang top three scorers nga sila si Jalen Williams ug Chet Holmgren, kinsa parehong adunay angol sa bat-ang.
Sama sa naandan, gipangulohan ni Shai Gilgeous-Alexander ang Thunder piuaagi sa iyang 26 puntos, nidugang og 19 puntos si Aaron Wiggins, nihatag og 14 puntos matag usa sila si Alex Caruso ug Isaiah Hartenstein, niamot og 12 puntos si Jaylin Williams samtang nitampo og 10 puntos si Luquentz Dort.
Ang Clippers gipangulohan ni Kawhi Leonard pinaagi sa iyang 25 puntos ug 10 rebounds, nitunol og 17 puntos si James Harden samtang nimugna og 15 puntos si Ivica Zubac.
Ang Clippers maoy unang niarangkada ug nakaposte kini og 10 puntos nga labaw human sa 1st quarter.
Hinayhinay nga ninggukod ang Thunder hangtod nga nailog nila ang labaw ug nakamugna sila og siyam ka puntos nga labaw, 60-51, sa sayong bahin sa 3rd quarter.
Ning higayuna, ang Clippers na sab ang hinayhinay nga ninggukod hangtod nga nailog nila pagbalik ang labaw, 93-92, sa nahabiling 5:49 minutos.
Human niini, grabe na kasikit ang engkuwentro.
Ang three-point shot ni Caruso maoy nakahatag sa Thunder og 100-99 nga labaw sa nahabiling 1:54 minutos.
Grabe man kasikit ang duwa apan wala na gyud buhii sa Thunder ang labaw hangtod na sa katapusang gutlo. / AP