Gisugdan na sa Commission on Higher Education (Ched) ang imbestigasyon batok sa Cebu Normal University (CNU) subay sa kalit nga pag-usab sa desisyon niini nga ipatuman ang full online class bisan pa sa kakuwang sa approval sa board.
Si Ched Chairperson Dr. Shirley Agrupis nipahibalo sa Martes, Agusto 5, 2025, nga si CNU President Daniel Ariaso Sr. niluwat og pamahayag sa Hulyo 21 pinaagi sa usa ka memorandum nga nagmando sa pagpatuman sa 100 porsiyento nga online learning, apan gibakwi niadtong Agusto 2.
Bisan pa niini, gipasabot sa Ched nga ang giluwatan nga Memorandum Circular No. 45, giingong naglatid gihapon sa giingong dili awtorisadong probisyon nga giklaro ubos sa Board of Regents.
Ang Ched nihatag og tagal sa Central Visayas office hangtod sa Agusto 9, aron ipaubos sa imbestigasyon ug mosumiter og report kalabot sa gihimong pagsusi sa mga lagda nga gisupak sa tunghaan may labot sa on-site learning guidelines.
Sa nasayran, una na nga gikwestyon sa mga tinun-an ang kalit nga pag-usab sa desisyon nga ipatuman ang full online class bisan og giingong wala kini moagi sa consultation ug uban pang kakulian.
Nasayran nga moabot sa 18 ka mga grupo sa mga tinun-an ang nipadayag sa ilang concerns sa kabag-ohan ilabi na nga sagad kanila nag-abang, walay igong internet access ug epekto niini sa mental health.
Si Ariaso, una na nga nangayo og pasensya ug pagsabot sa mga tinun-an nga naapektuhan. Kahinumdoman nga gipatuman ang full online class gumikan sa gihimong construction sa sulod sa tunghaan tungod sa tinguha niining smart campus nga gipundohan sa gobiyerno og moabot sa P2 bilyunes. /