Gihatagan og atensyon sa state auditors ang kakulang sa gobyerno sa igong seguridad alang sa Cebu International Convention Center (CICC) nga nag-ingon nga kini sama sa dili maayong pagdumala sa mga kabtangan sa gobyerno.
Sa 2023 audit report sa Commission on Audit (COA), giingon nga ang kakulang sa pagbantay sa City Government mahimong hinungdan sa pagpangawat sa mga parte ug gamit sa building, nga misangpot sa pag-usik sa mga kabtabangan nga gipanag-iya sa gobyerno.
Gipasiugda sa audit report nga kini nga isyo nahisupak sa Seksyon 2 sa Presidential Decree No. 1445, nga nagdumala sa husto nga pagdumala sa mga kabtangan sa gobyerno.
Ang CICC, nga kaniadto usa ka iladong landmark sa Siyudad, gipasagdan nga gubaon sulod sa pipila ka tuig ug giandam alang sa demolisyon
Apan, ang mga nakit-an sa COA nagpakita nga ang kakulang sa seguridad misamot sa kalisod sa building, tungod kay ang nagpadayon nga pagkawala sa mga kabtangan sa gobyerno nagdugang sa kadaot sa istruktura.
Aron matubag ang isyo, girekomenda sa COA nga ang General Services Officer ug ang Chief sa Property Division magpahigayon og dali nga inspeksyon ug pag-assess sa kahimtang karon sa CICC.
Gipanawagan usab nila ang usa ka halapad nga imbestigasyon aron masuta kung unsa nga mga bahin ang gipangawat ug ma-evaluate ang tibuok extent sa kadaot tungod sa kakulang sa seguridad.
Gitambagan sa COA ang City Government nga palig-unon ang mga seguridad sa palibot sa CICC, nga naglambigit sa pagdugang og mga personnel aron mabantayan ang maong lugar.
Gi-stress sa audit body nga samtang nagpaabot pa sa demolisyon, kinahanglan nga buhaton ang mga lakang aron maprotektahan ang nahibilin nga mga kabtangan aron malikayan ang dugang nga usik sa salapi sa kagamhanan.
Sa tubag niini nga nakita sa COA, si Acting Vice Mayor Glenn Bercede nagpasalig sa publiko nga adunay na’y mga lakang nga gibuhat aron maseguro ang seguridad sa maong lugar.
Sa iyang pakighinabi sa mga reporter niadtong Huwebes, Septiyembre 5, 2024, giingon ni Bercede nga giseguro na ang CICC ug wala na gitugotan ang mga informal settlers nga maka-access sa building.
Gipasabot ni Bercede nga human sa groundbreaking sa bag-ong one-stop-shop government center sa Agusto 29, ang WT Construction, ang contractor sa proyekto, gisugo sa pagbantay ug pag-monitor sa CICC premises.
Ang demolisyon sa CICC ug ang pagtukod sa bag-ong pasilidad mipalihok usab sa mga 500 ka informal settlers, kadaghanan sa mga biktima sa sunog niadtong 2016 ug 2019, ngadto sa ubang mga housing facilities.
Gipahimangnoan sa COA ang kahinungdanon sa husto nga pagdumala ug pagseguro sa mga kabtangan sa gobyerno labi na kadtong mga nagpaabot ug redevelopment.
Samtang hapit na ang demolisyon, kinahanglan nga maampingan ug bantayan pag-ayo sa City Government nga walay dugang nga pagkawala nga mahitabo, labi na kay ang pagtukod sa bag-ong government center magsugod na diin nagpakita sa paningkamot sa Siyudad aron mapaayo ug molambo usab ang turismo pinaagi sa bag-ong sentro sa kagamhanan sa Mandaue. / CAV