Gipanghimakak ni Cebuano Hotshot Dondon Hontiveros ang taho nga posible siya mobalik pagduwa sa usa ka mayorihiyang basketball tournament sa Pilipinas sa edad nga 48.
Sa niaging adlaw, adunay taho nga posibleng moduwa si Hontiveros sa Cebu Greats sa Maharlika Pilipinas Basketball League (MPBL).
Basi kini sa gisulti ni Greats coach Junthy Valenzuela dihang giinterbyu kini sa Spin.ph atol sa iyang personal nga pagtan-aw og semi-final games sa Philippine Basketball Association (PBA) Season 49 Philippine Cup niadtong Miyerkules, Hulyo 2, 2025.
Sa gitumbok nga mga duwa, personal sab nga nitan-aw si Hontiveros, kinsa kanhi vice mayor sa Dakbayan sa Sugbo.
Matod pa ni Valenzuela, kinsa kanhi sab magduduwa sa PBA sama ni Hontiveros, nga sa inisyal nga kasabutan, kuhaon si Hontiveros isip sakop sa iyang coaching staff.
Apan giklaro ni Valenzuela nga adunay posibilidad nga mobalik pagduwa si Hontiveros gumikan kay anaa pa man kini sa saktong kondisyon taliwala sa pangidaron niini.
“Actually, si Dondon, sabi ni Boss John (Santos, team manager), magiging assistant coach,” pasabot ni Valenzuela sa interbyu sa Spin.ph.
“Sabi ko, actually, si Dondon, puwede pang maging player natin ‘yan. Fit siya ngayon, laging naglalaro. Sinabi ko rin kay Dondon na puwede ka pa rin naman talaga. Kundisyon siya, nandoon pa rin ‘yung shooting niya.”
Apan dihang gikuhaan og katin-awan sa Superbalita Cebu, si Hontiveros nitataw nga wala na siya’y plano nga mobalik pagduwa sa usa ka mayorihiyang torneyo.
“Dili na tinuod. Mura’g binuang ra man tingali to kang Junthy. Lahi na gyud biya ang lihok sa 40-above,” asoy ni Hontiveros dala pahiyom. “Dili sab ko gusto nga moduwa nga dili na maka-deliver.”
Hinuon giangkon ni Hontiveros nga nitando na siya nga mahimong sakop sa coaching staff sa Greats.
Gipasabot ni Hontiveros nga naghinamhinam siya kabahin sa ugma damlag sa Greats gumikan kay kadaghanan sa mga sakop niini pulos mga Sugbuanon o Cebu-based nga mga magduduwa.
Nagbalik-lantaw siya sa dihang nagduwa pa siya sa Cebu Gems kaniadto sa nabungkag nga Metropolitan Baskletball Association (MBA).
Sa kasamtangang season sa MPBL, ang Greats kuli na nga makaabante sa playoffs gumikan kay kinahanglan niining haruson pagdaog ang katapusan niining 10 ka mga duwa sa elimination round.
“Maghunahuna na lang ta sa future,” asoy ni Hontiveros.
Si Hontiveros usa sa dekalidad nga mga magduduwa sa PBA nga gikan sa Sugbo. Sulod sab sa 17 ka mga tuig nga nagduwa si Hontiveros sa PBA ubos sa mga kampo sa Tanduay, San Miguel, Air21, Petron, ug Alaska.
Nahimo sab siyang pambato sa Gilas Pilipinas. / ESL