Mga kandidato sa Dakbayan sa Mandaue alang sa May 2025 election mahimo lang makataod sa ilang campaign posters ug ubang materials sa designated areas sa 27 ka barangay apil na sa mga dapit sa duol sa barangay halls, plaza, ug covered court.
Ang mga kandidato tugotan nga makapamutang sa ilang mga poster sa higayon nga magsugod na sa campaign period sa Marso 28 ngadto sa Mayo 10, 2025.
Ang Commission on Elections (Comelec) pahugtan ang pag-monitor kon nituman ba ang mga kandidato.
Ila sab ipatuman ang ‘Oplan Baklas’ magtangtang sa campaign materials nga nisupak sa mga lagda, matod ni Comelec Election Assistant Jacqueline Reuyan niadtong Lunes, Enero 27, 2025.
Ang mga designated areas naglakip sa Burgos Street atubangan sa San Roque Chapel sa Barangay Alang-Alang, duol sa Barangay Gym sa Purok IV, L. Jayme Street sa Barangay Bakilid, ug duol sa Matias, atubangan sa Gateway, ug Banilad Elementary School sa Barangay Banilad.
Sa Barangay Basak, ang mga poster mahimong ipamutang sa National Highway paingon sa north, kilid sa Grand Mall ug Fatima Church, samtang sa Barangay Casuntingan adto sa eskina M.L. Quezon Street ug Gethsemane Road.
Ang Barangay Centro motugot sa campaign materials sa may A. Soriano Street atubangan sa Mandaue Sports Complex ug sa Barangay Cubacub adto sa V. Vega Street kilid sa Barangay Gym. Samtang sa Barangay Guizo, ang mga poster mahimong ipamutang sa A.S. Fortuna Street Extension kilid sa CICC Building, ug sa Barangay Ibabao-Estancia adto sa G. Ouano Extension kilid sa Barangay Gym ug Ibabao Estancia Elementary School.
Ang mga poster sa Barangay Jagobiao mahimong ipamutang sa eskina sa National Highway ug Eversley Child Sanitarium Road duol sa Skywalk, samtang sa Barangay Labogon adto sa Sitio Sto. Niño kilid sa Barangay Gym ug Labogon National High School.
Ang Barangay Looc motugot sa mga poster sa Catalino LL Ouano Street ubos sa Old Mactan Bridge, ug sa Barangay Maguikay adto sa V. Albano ug M. Ceniza Street.
Sa Barangay Mantuyong, ang designated area mao ang B. Ceniza Street, Zone VII (Ilahan), ug sa Barangay Opao adto sa eskina Ouano ug Cabahug Street kilid sa Barangay Gym.
Sa Barangay Pakna-an adto sa Jayme Street kilid sa Paknaan Elementary School, samtang sa Barangay Pagsabungan adto sa Z. Estrella Street kilid sa Pagsabungan Elementary School.
Sa Barangay Subangdaku, ang campaign materials gitugot sa S.O. Albano Street atbang sa Post Office ug NTC Compound.
Gitugot sa Barangay Tabok adto sa Lower Mabugat Road kilid sa Clear Export samtang sa Barangay Tawason adto sa Purok Tambis duol sa Barangay Gym sa Chapel Main Road.
Ang mga poster sa Barangay Tingub adto ipamutang sa C. Suico Street kilid sa Tingub National High School, ug sa Barangay Tipolo adto sa Basubas Street duol sa Tipolo Elementary School.
Ang Barangay Umapad dunay duha ka designated areas, sa entrada sa Batiller Street sa Opao Barangay Road duol sa Opao Elementary School, ug sa Purok Kalubihan 2, eskina sa Pajara General.
Nipasidaan si Reuyan nga ang campaign materials nga ipamutang sa wala gitugot nga lugar sama sa mga punoan sa kahoy ug electrical posts, ila kining panangtangon.
Gipahinumdoman ang mga kandidato nga ang mga poster ug ubang campaing materials kinahanglang motuman sa gitugot nga gidak-on .
Ang labing gamay sama sa bond paper ang gidak-on ug ang pinakadako, cartolina size.
Ang mga temporary structures alang sa posters kinahanglan bungkagon sud sa lima kaadlaw human sa eleksyon.
“Every barangay now has a designated area. This ensures better exposure for the candidates and brings the campaign closer to the public,” matod ni Reuyan.
Sa buwag nga interview, si Comelec 7 Regional Director Francisco Pobe nagkanayon nga aron masiguro ang ang tanang mga kandidato nituman sa mga lagda, sugod sa Pebrero 11, panangtangon na ang mga poster sa mga kandidato sa national nga nagsugod na sa pagpamutang. / CAV, CDF