Siyento porsiyento na nga andam ang Commission on Elections (Comelec) Cebu Province alang sa ipahigayon nga piniliay karong adlawa sa tibuok lalawigan.
Kini maoy gipahibawo ni Atty. Marchel Sarno, election supervisor sa Comelec Cebu Province.
Matod ni Sarno, sanglit nakompleto na nila ang pagpangandam, nanghinaot na lang ang buhatan sa hapsay nga piniliay karong adlawa, Mayo 12, 2025.
Gipahinumdoman usab ni Sarno ang mga botante nga dili magpadala sa mga gustong mopalit sa ilang boto.
Iya usab nga giawhag ang publiko nga mosumbong sa mga “Kontra Bigay” help desks kon adunay mohaylo kanila og kwarta.
“Lakip sa ilang pagsumbong ang ebidensya. Kay unsaon man gud nato pag-prosecute og walay ebidensya. Siguro tabangan nato ang Comelec ug other government agencies such as atong PNP sa pagprosecute sa vote buying. Kay kanang social media lang mahulog na siya nga dili mobarog sa korte,” matod ni Sarno.
Gidugang niya nga mas maayo usab nga inay magbagulbol sa dagan sa pangagamhanan, ipakita ang kusog sa publiko pinaagi sa pag-boto.
Pasidaan sa Comelec, magbawon og payong, tubig ug taas nga pailub ning adlaw sa piniliay ug abagan ang ilang buhatan alang sa hapsay nga pagpili. (ANV)