Moabot sa 5,688 ang nakaparehistro sa unang adlaw sa subling pagbukas sa voter registration sa Commission on Election (Comelec) sa Rehiyon 7 sa alas 6:00 sa hapon sa Biyernes, Agusto 1, 2025.
Kini maoy gipahibawo ni Atty. Francisco Pobe, pangu sa Comelec Region-7 subay sa pagbukas sa pagrehistro alang sa 2025 Barangay ug Sangguniang Kabataan Elections (BSKE).
Sa maong datos 5, 483 niini ang nakaparehistro sa Sugbo samtang 205 ang sa Lalawigan sa Bohol. Gilauman nga madugangan pa ang maong datos sa mosunod pang mga adlaw hangtod na sa uwahing adlaw niini sa Agusto 10.
Gisubli sa Comelec nga bukas ang registration sugod alas 8:00 hangtod sa alas 5:00 sa hapon gikan sa Lunes hangtod sa Doninggo sa mga buhatan sa Election Officer o sa satellite registration sites. Gipahinumdoman ang mga gustong morehistro nga dili kalimtan ang pagdala og valid ID sama sa National ID, Postal ID, PWD ID, Student’s ID, Passport, NBI Clearance ug uban pa. / ANV