Gibarugan sa Commission on Elections (Comelec) ang pagbasura sa petisyon nga i-disqualify ang Bagong Henerasyon (BH) Party-list.
Kini nga desisyon nagpaduol sa party-list sa proklamasyon sa National Board of Canvassers (NBOC).
Sa walo ka pahina nga resolusyon, gibasura sa Comelec en banc ang Motion for Reconsideration nga gisang-at ni Atty. Russell Geronimo, nga nag-ingon nga ang inisyal nga desisyon sa First Division naghatag og igong basehan ug nahiuyon sa balaod.
“The Assailed Order was neither without sufficient basis found in the records, nor contrary to law. The allegations in the Motion merely reiterate points already considered and passed upon in the Assailed Order, without presenting any new, compelling evidence that would alter the factual or legal conclusions previously reached,” matod sa Comelec en banc.
“In view of the foregoing. We find no cogent reason to depart from the Assailed Order of the Commission (First Division),” ilang gidugang.
Sa Order niini, gibasura sa Comelec First Division ang petisyon nga tangtangon ang BH party-list sa piniliay niadtong Mayo 12, nga nagtumbok sa kapakyas sa petitioner sa pagsunod sa mandatory requirements.
Kini naglakip sa kapakyas paghatag og kopya sa petisyon ngadto sa respondent pinaagi sa personal nga serbisyo; ingon man ang kapakyas sa pag-attach og kopya sa Certificate of Nomination-Certificate of Acceptance of Nomination (CON-CAN).
Sa desisyon niini, ang Comelec en banc niingon nga wa masayop ang First Division pag-insistir sa pagsunod sa mandatory requirements nga gitakda sa balaod.
“To grant reconsideration under the present circumstances would be to undermine the integrity of the Commission’s own procedural framework and open the floodgates to negligent, or even worse tactical, non-compliance,” matod sa Comelec.
Uban niini nga desisyon, ang BH party-list mahimong iproklamar sa dili madugay sa NBOC.
Ang party-list nakadaog og usa ka lingkuranan nga adunay 319,803 ka boto.
Gisuspenso sa NBOC ang proklamasyon niini tungod sa disqualification case.
Si Comelec Spokesman John Rex Laudiangco niingon nga posible ang proklamasyon sa higayon nga mahimong “final and executory” ang desisyon sa en banc.
“Proclamation may ensue. But the decision of the Commission en banc will need to be final and executory first,” matod ni Laudiangco.
Namatikdan niya nga mahimo pa nga dad-on sa petitioner ang kaso sa Korte Suprema.
“In case the petitioner takes the case to the Supreme Court but fails to secure a temporary restraining order, the en banc decision will become final and executory within five days,” pasabot ni Laudiangco.